როდესაც პირველი Toy Story 1995 წელს გამოვიდა, Google ჯერ კიდევ არ არსებობდა, ხოლო Apple გაკოტრების ზღვარზე იდგა. მაშინ ვერავინ წარმოიდგენდა, რომ 30 წელზე მეტი ხნის შემდეგ Pixar კვლავ გააგრძელებდა ამ ლეგენდარულ ფრენჩაიზს. კიდევ უფრო წარმოუდგენელი კი ის იყო, რომ „Toy Story 5“-ში ვუდი და ბაზი ბოროტ ხელოვნურ ინტელექტიან პლანშეტს, სახელად Lilypad-ს დაუპირისპირდებოდნენ.
ფილმის ახალი ტრეილერი ძველებურ, კლასიკურ სათამაშოებს, ქალბატონ კარტოფილთავას, რექსსა და სლინკი დოგს, თანამედროვე ტექნოლოგიების ბნელ და შემაშფოთებელ საფრთხეს უპირისპირებს. სიუჟეტის ცენტრში კვლავ ბონია, გოგონა, რომელმაც ენდის სათამაშოები მიიღო მას შემდეგ, რაც ის კოლეჯში წავიდა.
ტრეილერში ვხედავთ, როგორ თამაშობს ბონი გარეთ თავის სათამაშოებთან ერთად, როცა მოულოდნელად მისთვის გამოგზავნილი ამანათი ჩამოდის. შიგნით კი ხელოვნურ ინტელექტზე დაფუძნებული პლანშეტი Lilypad აღმოჩნდება. გოგონა სწრაფად იძირება ეკრანში და ისე ეჩვევა მოწყობილობას, რომ მშობლების სიტყვებსაც აღარ აქცევს ყურადღებას, როცა ისინი ეუბნებიან, რომ ეკრანთან გატარებული დრო ამოიწურა.
„Toy Story 5“-ის ტრეილერში Lilypad, იგივე ლილი, აშკარად ნეგატიურ პერსონაჟად არის წარმოდგენილი. როდესაც ჯესი პლანშეტს ბონის კეთილდღეობაზე ელაპარაკება, ლილი თითქოს ყურადღებას არ აქცევს. ამის შემდეგ ჯესი მკაცრად მოსთხოვს მას, მოუსმინოს. პასუხი კი შემაშფოთებელია: „მე ყოველთვის გისმენ“, ამბობს ლილი მუქარანარევი ტონით და ჯესის ემოციურ სიტყვებს ცივი, კომპიუტერული ხმით იმეორებს, შემდეგ კი მათ ესპანურად თარგმნის.
„ტექნოლოგია ჩვენს სახლში შემოიჭრა“, ეუბნება ჯესი ვუდის, „ამ მოწყობილობით ბონის ვკარგავ“.
ვუდი პასუხობს: „სათამაშოები თამაშისთვისაა, მაგრამ ტექნოლოგია ყველაფრისთვის“.
შეძლებს თუ არა „Toy Story 5“ პატარა მაყურებლების დაფიქრებას ეკრანებთან ზედმეტად დიდი დროის გატარების შედეგებზე? ეს შესაძლოა ზედმეტად ამბიციური მიზანი იყოს. თუმცა ერთი რამ ცხადია, ფილმი ბავშვებს სთავაზობს სანახაობას, რომელიც ბევრად უფრო შინაარსიანი და გააზრებულია, ვიდრე უბრალოდ მორიგი „ტვინის გამოთიშველი“ კონტენტი, როგორიც, მაგალითად, Cocomelon-ია.
