ბოლო წუთების ინფორმაციით, აქტივისტებმა ზუგდიდის თხილის ქარხნის მიმდებარე ტერიტორიიდან, ქუთაისის ცხოველთა თავშესაფარში გადაყვანილი მიუსაფარი ძაღლების ნაწილი კვლავ ქალაქში დააბრუნეს. ცხოველთა უფლებადამცველის, ლიკა აკობიას განცხადებით, ზუგდიდიდან ქუთაისში დაახლოებით 65 ძაღლი იყო გადაყვანილი, საიდანაც 28 უკვე დაბრუნებულია, ხოლო დარჩენილი 37 კვლავ თავშესაფარში იმყოფება.

როგორც აკობია NEWS.On.ge-სთან განმარტავს, აქტივისტები დარჩენილი ძაღლების დაბრუნებასაც გეგმავენ: ისინი აპირებენ თავშესაფარში მისვლას, ცხოველების წამოყვანასა და მათ კვლავ იმ ლოკაციებზე განთავსებას, სადაც მანამდე ადგილობრივ მოსახლეობასთან იყვნენ შეგუებული.

ამ ფონზე, ქვეყანაში ცხოველთა უფლებების დაცვის საკითხი კიდევ უფრო მწვავდება. ცხოველთა დამცველები შაბათს, 4 აპრილს, 15:00 საათზე, მთავრობის ადმინისტრაციასთან საპროტესტო აქციას გამართავენ ლოზუნგით - „არა მიუსაფარების გენოციდს! იყავი მიუსაფარების ხმა!“.

პარალელურად, ვითარებას ამძაფრებს კრემატორიუმებთან დაკავშირებული ურთიერთგამომრიცხავი განცხადებები. მიუსაფარი შინაური ცხოველების მართვის შიდა ქართლის ინტერმუნიციპალური სააგენტო უარყოფს სოციალურ ქსელში გავრცელებულ ინფორმაციას, თითქოს თავშესაფრებში ძაღლების მასობრივად დაწვა მიმდინარეობდეს. უწყების განმარტებით, კრემატორიუმი გამოიყენება მხოლოდ ვეტერინარული ნარჩენებისა და უკვე გარდაცვლილი ცხოველების უტილიზაციისთვის და საზოგადოებას მოუწოდებს, თავი შეიკავოს დაუზუსტებელი ინფორმაციის გავრცელებისგან.

თუმცა, ცხოველთა უფლებადამცველები ამ განცხადებებს არ ენდობიან და ეჭვს გამოთქვამენ, რომ მთავრობის მიერ დაანონსებული ღონისძიებების ფარგლებში შესაძლოა მიუსაფარი ძაღლების მასობრივი განადგურება მიმდინარეობდეს. აღნიშნულ ეჭვებს აძლიერებს გორში გადაღებული ვიდეომასალაც, სადაც, აქტივისტ ირმა მთიულიშვილის თქმით, თავშესაფრის კრემატორიუმის საკვამურიდან ინტენსიური თეთრ-ნაცრისფერი გამონაბოლქვი ამოდის, რასაც თან ახლავს მძაფრი სუნი.

სპეციალისტების განმარტებით, მოქმედი ტექნიკური სტანდარტების მიხედვით, კრემატორიუმის მუშაობისას ხილული კვამლი, როგორც წესი, არ უნდა ფიქსირდებოდეს, გარდა კონდენსირებული ორთქლისა, ხოლო გამონაბოლქვი არ უნდა იყოს მუდმივი და მძაფრი სუნის შემცველი. შესაბამისად, არსებული კადრები დამატებით შემოწმებას საჭიროებს.

თავის მხრივ, სურსათის ეროვნული სააგენტო აცხადებს, რომ პროცესები კოორდინირებულად მიმდინარეობს და თავშესაფრებში მოხვედრილი ძაღლები სტერილიზაციისა და კასტრაციის შემდეგ ბუნებრივ გარემოში ბრუნდებიან.

მოვლენებს კიდევ ერთი სკანდალური განცხადება დაემატა - თამაზ ელიზბარაშვილმა 1 აპრილის ღამეს გაავრცელა ვიდეო, სადაც ამტკიცებს, რომ გორის სახელმწიფო თავშესაფარში კრემატორიუმი უჩვეულოდ ინტენსიურად მუშაობდა მას შემდეგ, რაც ტერიტორიაზე სურსათის სააგენტოს ძაღლდამჭერი მანქანები შევიდნენ. მისი თქმით, ღამის საათებში დაწყებული პროცესი დილისკენაც არ შეწყვეტილა და ტერიტორიაზე დამწვარი ხორცისა და ბეწვის მძაფრი სუნი იგრძნობოდა. ელიზბარაშვილი შესაბამის უწყებებს განმარტებისკენ მოუწოდებს და კითხვას სვამს - რა ხდება თავშესაფარში და რატომ გააქტიურდა კრემატორიუმი სწორედ აღნიშნული ვიზიტის შემდეგ.

მიუხედავად ოფიციალური განმარტებებისა, საზოგადოებაში კითხვები კვლავ რჩება, ხოლო ცხოველთა დამცველები ამბობენ, რომ საკითხის სრულყოფილი გამოძიება და გამჭვირვალობა აუცილებელია. სწორედ ამ მოთხოვნებით აპირებენ ისინი 4 აპრილის აქციაზე შეკრებას.