მუნჯაროს შეწყვეტის შემდეგ წონის დაბრუნებასთან ერთად შესაძლოა ჯანმრთელობის გაუმჯობესებული მაჩვენებლებიც გაუარესდეს — კვლევა

ახალი კვლევის მიხედვით, ადამიანები, რომლებიც წონის კლების პრეპარატ მუნჯაროს გამოყენებას წყვეტენ, ხშირად არა მხოლოდ დაკარგულ წონას იბრუნებენ, არამედ შესაძლოა დაკარგონ ის ჯანმრთელობის სარგებელიც, რომელიც მკურნალობის პერიოდში მიიღეს.

მუნჯარო, რომლის აქტიური ნივთიერებაა ტირზეპატიდი, ბოლო წლებში წონის კლების ერთ-ერთ პოპულარულ პრეპარატად იქცა. კვლევების მიხედვით, 72-კვირიანი მკურნალობის შემდეგ მას შეუძლია ადამიანებს სხეულის წონის დაახლოებით 20%-ის დაკლებაში დაეხმაროს. თუმცა, ახალი ანალიზი აჩვენებს, რომ პრეპარატის შეწყვეტის შემდეგ წონის დიდი ნაწილი ხშირად ბრუნდება. 

მკვლევრებმა Surmount-4-ის კლინიკური ცდის მონაცემები გააანალიზეს. ყველა მონაწილე 36 კვირის განმავლობაში იღებდა ტირზეპატიდს, პარალელურად კი ჰქონდა დიეტისა და ფიზიკური აქტივობის მხარდაჭერაც. ამის შემდეგ მონაწილეთა ნაწილი პრეპარატის მიღებას აგრძელებდა, ნაწილი კი პლაცებოზე გადაიყვანეს.

შედეგების მიხედვით, იმ მონაწილეთა 82%-მა, რომლებმაც მკურნალობის პირველ ეტაპზე სხეულის წონის მინიმუმ 10% დაიკლეს და შემდეგ პრეპარატი შეწყვიტეს, ერთი წლის განმავლობაში დაკარგული წონის 25%-ზე მეტი ისევ დაიბრუნა. წონის მატებასთან ერთად გაუარესდა სხვა მაჩვენებლებიც — მათ შორის წელის გარშემოწერილობა, არტერიული წნევა, „ცუდი“ ქოლესტერინი და სისხლში გლუკოზის დონე. 

გლაზგოს უნივერსიტეტის კარდიომეტაბოლური მედიცინის პროფესორის, ნავედ სატარის შეფასებით, ეს შედეგები მოულოდნელი არ არის, რადგან ჭარბი წონა პირდაპირ უკავშირდება არტერიულ წნევას, გლუკოზის კონტროლსა და სხვა კარდიომეტაბოლურ რისკებს.

სპეციალისტები ამბობენ, რომ წონის კლების პრეპარატები ეფექტიანია, თუმცა მათი შეწყვეტის შემდეგ შედეგების შენარჩუნება რთულ გამოწვევად რჩება. სწორედ ამიტომ, გრძელვადიანი შედეგისთვის მნიშვნელოვანია არა მხოლოდ მედიკამენტი, არამედ კვების, ფიზიკური აქტივობისა და ცხოვრების წესის მდგრადი ცვლილებებიც.

კვლევის ავტორების დასკვნით, წონის გრძელვადიანი მართვა გადამწყვეტია იმისთვის, რომ შენარჩუნდეს როგორც წონის კლება, ისე ჯანმრთელობის გაუმჯობესებული მაჩვენებლები.