საფრანგეთი პირველი ევროპული ქვეყანა გახდა, რომელმაც 15 წლამდე ბავშვებისთვის სოციალური ქსელების გამოყენების აკრძალვა დაამტკიცა.

კანონპროექტს საფრანგეთის ეროვნულ ასამბლეაში 279 დეპუტატმა დაუჭირა მხარი, 81 კი წინააღმდეგ წავიდა. საბოლოოდ ამოქმედებამდე კანონი საკონსტიტუციო საბჭომ უნდა შეაფასოს.

ახალი წესების მიხედვით, 15 წლამდე ბავშვები 1-ელი სექტემბრიდან ვეღარ შექმნიან ახალ ანგარიშებს TikTok-ზე, Instagram-ზე, Snapchat-სა და სხვა სოციალურ პლატფორმებზე. 2027 წლის იანვრიდან შეზღუდვა უკვე არსებულ ანგარიშებზეც გავრცელდება.

მომხმარებლების ასაკის გადამოწმება თავად პლატფორმებს დაევალებათ. არასრულწლოვნის აღმოჩენის შემთხვევაში ანგარიში დაიხურება. მთავრობა აცხადებს, რომ ასაკის შემოწმებისას პერსონალური მონაცემები დაცული იქნება.

აკრძალვა არ შეეხება ონლაინენციკლოპედიებსა და საგანმანათლებლო პლატფორმებს. კანონი არც ბავშვებისა და არც მათი მშობლების დაჯარიმებას ითვალისწინებს.

პრეზიდენტ ემანუელ მაკრონის განცხადებით, ეს ნაბიჯი ბავშვებისა და მოზარდების ონლაინსივრცეში დაცვისთვის მნიშვნელოვანი ცვლილებაა. შეზღუდვის დაწესების ერთ-ერთ მიზეზად სოციალური ქსელების გავლენა მოზარდების ფსიქიკურ ჯანმრთელობაზე სახელდება.

კანონს მოწინააღმდეგეებიც ჰყავს. მათი ნაწილი ასაკის გადამოწმებისას კონფიდენციალურობის შესაძლო დარღვევასა და აკრძალვის გვერდის ავლის რისკებზე მიუთითებს.

მსოფლიოში მსგავსი შეზღუდვა პირველად ავსტრალიამ შემოიღო, სადაც სოციალური ქსელების გამოყენება 16 წლამდე პირებს აეკრძალათ.