ზაფხულის სეზონი ოფიციალურად დაიწყო და მოდის ინდუსტრია უკვე განსაზღვრავს იმ ტენდენციებს, რომლებიც მომდევნო თვეებში ქუჩებს, კაფეებს, კურორტებსა და სოციალურ ქსელებს დაიპყრობს. ჟურნალ Vogue-ის რედაქტორებმა 2026 წლის ზაფხულის ყველაზე გამორჩეული ტრენდები დაასახელეს, რომელთა შორის სპორტული ელემენტები, დიდი ზომის აქსესუარები და 90-იანი წლების სტილის დაბრუნება განსაკუთრებით გამოირჩევა.
მოდის ერთ-ერთი მთავარი მიმართულება სპორტული მაისურების ყოველდღიურ სამოსში ინტეგრირება იქნება. მსოფლიო ჩემპიონატის ფონზე საფეხბურთო მაისურები მხოლოდ სტადიონებზე აღარ დარჩება და სხვადასხვა სტილის ტანსაცმელთან ერთად აქტიურად გამოჩნდება.
Vogue-ის პროგნოზით, პოპულარობას შეინარჩუნებს ფრინჯებიანი დეტალებიც, თუმცა ამჯერად უფრო თამამი და თანამედროვე ინტერპრეტაციებით. ფრინჯები გამოჩნდება კაბებზე, შარვლებზე, ქვედაბოლოებსა და აქსესუარებზეც.
ზაფხულის კიდევ ერთი მნიშვნელოვანი ტრენდი დიდი ზომის ჩანთებია. მოდის სახლები მომხმარებლებს XXL ფორმატის ჩანთებს სთავაზობენ, სადაც მარტივად თავსდება ყველაფერი, რაც ზაფხულის აქტიური დღის განმავლობაში შეიძლება დაგჭირდეთ - მზის სათვალიდან და წყლის ბოთლიდან დაწყებული, წიგნითა და სანაპიროს აქსესუარებით დასრულებული.
დიზაინერები ასევე პროგნოზირებენ გამჭვირვალე ქსოვილების აქტიურ დაბრუნებას. თხელი ბლუზები, ნახევრად გამჭვირვალე ქვედაბოლოები და ბადისებრი დეტალები ზაფხულის კოლექციების მნიშვნელოვან ნაწილს წარმოადგენს.
ფეხსაცმლის მიმართულებით მოდაში ბრუნდება მაღალი ქუსლები, პლატფორმები და ე.წ. „ვეჯ“ სანდლები, რომლებიც 1990-იანი წლების ესთეტიკას თანამედროვე ინტერპრეტაციით აცოცხლებს. ამავდროულად, პოპულარული გახდება უჩვეულო დიზაინის შლაპუნებიც, რომლებიც ყოველდღიურ სტილს მეტ ინდივიდუალიზმს შემატებს.
ფერებში კი განსაკუთრებული ადგილი ნეონის ტონებს უჭირავს. დიზაინერები ვარაუდობენ, რომ ყვითელი, ნარინჯისფერი, წითელი და სხვა მკვეთრი ფერები ზაფხულის მთავარი აქცენტები იქნება და განსაკუთრებით კარგად გამოჩნდება მზიან გარემოში.
Vogue-ის შეფასებით, 2026 წლის ზაფხულის მოდა ერთდროულად აერთიანებს კომფორტს, სპორტულ ელემენტებს, 90-იანი წლების ნოსტალგიასა და თამამ ექსპერიმენტებს, რაც სეზონს ერთ-ერთ ყველაზე მრავალფეროვანს გახდის ბოლო წლების განმავლობაში.
