ევროპის რამდენიმე ქვეყანაში ისტორიული სიცხეა. გერმანიაში, ჩეხეთში, პოლონეთსა და უნგრეთში კვირას ტემპერატურამ 40 გრადუსს გადააჭარბა, რის შედეგადაც რეგიონში ახალი რეკორდები დაფიქსირდა. ექსტრემალური სიცხის ტალღა, რომელსაც დასავლეთ ევროპაში ასობით ადამიანის გარდაცვალებას უკავშირებენ, აღმოსავლეთ ევროპისკენ გავრცელდა.
არსებული მონაცემებით, ევროპაში 191 მილიონზე მეტი ადამიანი 35 გრადუსზე მაღალ ტემპერატურას გაუმკლავდა. რეგიონში გამოცხადებულია მაღალი ტემპერატურის შესახებ გაფრთხილებები.
გერმანიაში, წინასწარი მონაცემებით, ქვეყნის ისტორიაში ყველაზე მაღალი ტემპერატურა დაფიქსირდა. აღმოსავლეთ ბრანდენბურგში, პოლონეთის საზღვართან მდებარე კოშენში, ტემპერატურამ 41.7 გრადუსს მიაღწია. ამ მაჩვენებელმა ერთი დღით ადრე დრევიცში დაფიქსირებული 41.5 გრადუსიანი რეკორდი გააუმჯობესა.
აღმოსავლეთ გერმანიაში, გორიშჰაიდეს ტყის ტერიტორიაზე, სადაც მეორე მსოფლიო ომის დროინდელი საბრძოლო მასალებია დარჩენილი, ხანძარი გაჩნდა. ხანძრის ჩაქრობის სამუშაოები აფეთქებებმა გაართულა, რის გამოც მეხანძრეებს გარკვეული დროით მოქმედების შეჩერება მოუწიათ. ადგილზე გამნაღმველი ჯგუფიც გამოიძახეს. ხანძრის გავრცელების გამო ტრაიზენში დაახლოებით 650 ადამიანს საცხოვრებელი სახლების დატოვება მოუწია.
ბერლინში პოლიციამ მოსახლეობისა და ტურისტების გასაგრილებლად წყლის ჭავლი ჰაერში გაუშვა. გერმანიის რკინიგზის ოპერატორმა Deutsche Bahn-მა მოქალაქეებს მოუწოდა, აუცილებლობის გარეშე მგზავრობისგან თავი შეეკავებინათ.
ისტორიული სიცხე დაფიქსირდა პოლონეთშიც. ქვეყნის დასავლეთში, გერმანიის საზღვართან მდებარე სლუბიცეში, ტემპერატურამ 40.5 გრადუსს მიაღწია და 105 წლის წინ, 1921 წელს დაფიქსირებული 40.2 გრადუსიანი რეკორდი მოხსნა.
პოლონეთის მთავრობის უსაფრთხოების სააგენტომ მოსახლეობას მოკლე ტექსტური შეტყობინებები გაუგზავნა და მოუწოდა, თავი აარიდონ მზესა და ფიზიკურ დატვირთვას, მიიღონ წყალი და ატარონ ქუდი. რამდენიმე ქალაქში მოსახლეობის გასაგრილებლად წყლის ფარდები დაამონტაჟეს.
უნგრეთშიც ამ თარიღისთვის ახალი რეკორდი დაფიქსირდა. ბუდაკალასში ტემპერატურამ 40.7 გრადუსს მიაღწია, რაც წინა დღის 40 გრადუსიან მაჩვენებელზე მაღალია.
ჩეხეთში კი ქვეყნის ისტორიაში ყველაზე მაღალი ტემპერატურა დაფიქსირდა. დოკსანიში ტემპერატურამ 41.9 გრადუსს მიაღწია. ქვეყნის ჰიდრომეტეოროლოგიურმა ინსტიტუტმა განაცხადა, რომ ტემპერატურა ზრდას განაგრძობდა და ეს საბოლოო მაქსიმუმი არ იყო.
სლოვაკეთში, ქვეყნის სამხრეთ-დასავლეთ ნაწილში, მუჟლაში, 39.3 გრადუსი დაფიქსირდა. დანიაში კი შაბათს 1874 წლიდან, მას შემდეგ, რაც ქვეყანაში ტემპერატურის გაზომვა დაიწყო, ყველაზე მაღალი მაჩვენებელი აღირიცხა - 36.6 გრადუსი ოდენსეს ჩრდილოეთით.
ამ ფონზე საფრანგეთმა სიცხის ტალღასთან დაკავშირებული გარდაცვალების შემთხვევების დათვლა დაიწყო. საფრანგეთის საზოგადოებრივი ჯანმრთელობის ეროვნულმა სააგენტომ განაცხადა, რომ 24-დან 27 ივნისამდე, წინა თვეების მონაცემებთან შედარებით, 1 000-ით მეტი გარდაცვალება დაფიქსირდა. მონაცემები ჯერ წინასწარია და, სავარაუდოდ, მნიშვნელოვნად გაიზრდება.
გარდაცვალების შემთხვევების მკვეთრი მატება განსაკუთრებით სახლში გარდაცვლილ ადამიანებს უკავშირდება, მათ შორის პარიზისა და მისი გარეუბნების რეგიონში. გარდაცვლილთა უმეტესობა 65 წელს გადაცილებული იყო, თუმცა სიცხემ ახალგაზრდა ადამიანებიც დააზარალა.
საფრანგეთის საზოგადოებრივი ჯანმრთელობის სააგენტოს განცხადებით, ეს კიდევ ერთხელ აჩვენებს, რამდენად მნიშვნელოვანია სოლიდარობის ზომები იზოლაციაში მყოფი ან მარტო მცხოვრები ადამიანების მიმართ, მათ შორის დიდ ურბანულ ზონებში.
საფრანგეთის პრემიერ-მინისტრმა სებასტიენ ლეკორნიუმ განაცხადა, რომ საავადმყოფოები და გადაუდებელი დახმარების სამსახურები უახლოეს დღეებშიც მძიმე ზეწოლის ქვეშ დარჩებიან. ქვეყნის შინაგან საქმეთა მინისტრის, ლორან ნუნიესის ინფორმაციით, სიცხის პიკის პერიოდში სასწრაფო დახმარების სამსახურებმა 122 000-ზე მეტ გამოძახებაზე მოახდინეს რეაგირება.
წინასწარი მონაცემებით, ესპანეთში გასული კვირიდან ხუთშაბათამდე სიცხესთან შესაძლო კავშირში სულ მცირე 327 გარდაცვალების შემთხვევა განიხილება.
ევროპის ნაწილში სიცხეს ძლიერი შტორმებიც დაერთო. საფრანგეთის ჩრდილოეთში ძლიერი ელჭექი და ქარი დაფიქსირდა, რამაც გზებზე ხეების წაქცევა, სახლების დატბორვა და რამდენიმე ადამიანის დაშავება გამოიწვია. ენის დეპარტამენტში ელვამ რამდენიმე ხანძარი გააჩინა, მათ შორის ლაონში, სადაც ხუთი ადამიანი დაშავდა. კვირას დილით 60 000-ზე მეტი ოჯახი ელექტროენერგიის გარეშე დარჩა.
ბელგიაში კი ერთი ადამიანი დაიღუპა მას შემდეგ, რაც ბრიუსელის გარეთ, ძლიერი შტორმის დროს, მის ავტომობილს ხე დაეცა.
ევროპაში მიმდინარე რეკორდული სიცხე კიდევ ერთხელ აჩენს კითხვას, რამდენად მზად არის კონტინენტი ექსტრემალური ამინდისთვის, რომლის სიხშირე და სიმწვავე კლიმატის ცვლილებასთან ერთად იზრდება.
