მსოფლიო ჩემპიონატის შესარჩევის მეოთხე ტურში საქართველოს ნაკრები ქოჯაელში თურქეთთან 1:4 დამარცხდა.
თურქეთში ფავორიტებად არ ჩავსულვართ, თუმცა მხოლოდ გამარჯვება გვჭირდებოდა, რადგან ჯგუფში მდგომარეობიდან გამომდინარე, ეს მარცხი პრაქტიკულად აჩენს ჩვენს შანსებს ფინალურ ეტაპზე გასვლისთვის.
E ჯგუფში ამ შედეგის შემდეგ თურქეთს 6 ქულით ჩამოვრჩით და პირველ ადგილზე მყოფი ესპანეთიც კვლავ მყარად ინარჩუნებს ლიდერობას, რომელმაც პარალელურად 3:0 მოიგო.
მატჩი კარგად დავიწყეთ, ტემპი მაღალი იყო და ორთაბრძოლებშიც არ ვთმობდით. მე-12 წუთზე გვქონდა რეალური შანსი ანგარიშის გასახსნელად, მაგრამ კომბინაცია არ გამოგვივიდა და ზურიკოს არასასურველი პოზიციიდან მოუხდა დარტყმა. ზუსტად ერთ წუთში, თურქებმა ამ შეცდომით ისარგებლეს, ილდიზმა მამარდაშვილს თავზე გადაუგდო ბურთი და ანგარიში გახსნა.
გაშვებული გოლის შემდეგ გუნდმა თითქოს დაკარგა თავდაჯერება. მალევე ჩალჰანოღლუს კუთხურის შემდეგ დემირალმა თავური ზუსტად შეასრულა, ხოლო მესამე გოლი სწრაფი კონტრშეტევიდან გავუშვით-გოჩოლეიშვილმა ბურთი კარის ხაზიდან გამოიტანა, მაგრამ დამატებაზე დამზღვევი არავინ იყო და აკგუნმა ცარიელ კარში დაარტყა.
მეოთხე გოლი კვლავ იგივე სცენარით მივიღეთ, როგორც მეორე. დემირალმა კიდევ ერთხელ მოიგო საჰაერო ორთაბრძოლა, ამჯერად კიტეიშვილთან. ოთარმა მატჩის შემდეგ თქვა, რომ დემირალთან დგომა მისი პირდაპირი დავალება არ ყოფილა და ეს მხოლოდ ზონური დაცვის ნაწილი იყო. თუმცა ფაქტია, სტანდარტებზე დაცვამ ვერ იმუშავა.
მატჩის ბოლოს ქართველებმა მაინც მოახერხეს ერთი ლამაზი კომბინაცია, გიორგი ქოჩორაშვილმა ტექნიკურად შესრულებული დარტყმით გოლი გაიტანა და გულშემატკივარს მცირე შვება მაინც მოუტანა.
