რუსეთი არ აპირებს სტრასბურგის ადამიანის უფლებათა საერთაშორისო სასამართლოს გადაწყვეტილების შესრულებას და საქართველოსთვის 253 მილიონი ევროს გადახდას. ამის შესახებ განცხადება კრემლის პრესმდივანმა დმიტრი პესკოვმა გააკეთა.
„გადაწყვეტილებას არ აღვასრულებთ,“ – აღნიშნა პესკოვმა.
სტრასბურგის სასამართლომ ეს თანხა საქართველოს 29 ათასზე მეტ დაზარალებულ მოქალაქეს მიანიჭა 2008 წლის ომის შემდეგ რუსეთის მიერ განხორციელებული ბორდერიზაციისა და ადამიანის უფლებების სისტემური დარღვევების გამო.
გადაწყვეტილება საქმეზე „საქართველო რუსეთის წინააღმდეგ (IV)“ 2024 წლის აპრილში იქნა მიღებული, ხოლო 2025 წლის 14 ოქტომბერს განისაზღვრა კომპენსაციის ოდენობა.
სასამართლოს გადაწყვეტილებით, რუსეთმა უნდა გადაიხადოს:
224 მილიონი ევრო ქონების დაკარგვისა და საცხოვრებელზე წვდომის შეზღუდვისთვის,
20 მილიონი ევრო განათლების უფლების დარღვევისთვის,
5 მილიონი ევრო უკანონო დაკავებისთვის,
1,9 მილიონი ევრო წამებისა და არასათანადო მოპყრობისთვის,
1,3 მილიონი ევრო ძალის გადამეტებისთვის და
320 ათასი ევრო გადაადგილების შეზღუდვისთვის.
ევროპის საბჭოს მინისტრთა კომიტეტი განაგრძობს რუსეთის მიერ სასამართლოს გადაწყვეტილებების აღსრულების ზედამხედველობას და აღნიშნავს, რომ მოსკოვი ვალდებულია შეასრულოს ის განაჩენები, რომლებიც 2022 წლის 16 სექტემბრამდე მომხდარ ფაქტებს უკავშირდება. თუმცა რუსეთის ხელისუფლება აცხადებს, რომ აღარ აღასრულებს ევროპის საბჭოს გადაწყვეტილებებს 2022 წლის მარტის შემდეგ.
რუსეთი ევროსაბჭოდან უკრაინაში აგრესიის გამო 2022 წელს გარიცხეს. იმავე წლიდან ის ადამიანის უფლებათა ევროპული კონვენციის წევრი აღარ არის.
საქართველოს იუსტიციის სამინისტრომ სტრასბურგის გადაწყვეტილება “რუსეთის წინააღმდეგ მოგებული ისტორიული საქმეების ლოგიკურ გაგრძელებად” შეაფასა.
პრემიერ-მინისტრმა ირაკლი კობახიძემ კი განაცხადა, რომ რუსეთის პასუხისმგებლობა ომის დაწყების ფაქტს არ უკავშირდება, თუმცა ის ადამიანის უფლებების დარღვევის გამო დაისაჯა.
