საქართველოს პროკურატურამ 16 ადამიანს წაუყენა ბრალდება სტრატეგიული ობიექტის ჯგუფურად ხელში ჩაგდების მცდელობისა და ჯგუფურ ძალადობაში მონაწილეობის საქმეზე. მათ შორის ერთ-ერთს, უცხოეთში მყოფ ირაკლი შაიშმელაშვილს, ბრალი დაუსწრებლად წარედგინა. ის შინაგან საქმეთა სამინისტროს განსაკუთრებულ დავალებათა დეპარტამენტში მუშაობდა და თანამდებობა საკუთარი განცხადებით დატოვა. პროკურატურის ინფორმაციით, შაიშმელაშვილი საჯაროდ მოუწოდებდა ხელისუფლების დამხობისკენ და ცდილობდა სამინისტროს თანამშრომლების დემორალიზებას.

აქტივისტ მარიამ მეყანწიშვილს ბრალად ედება ჯგუფური მოქმედების ორგანიზებაში. გამოძიების მიხედვით, მან 4 ოქტომბერს მოქალაქეებს მოუწოდა პოლიციისადმი დაუმორჩილებლობისა და ძალადობრივი ქმედებებისკენ.

კიდევ 10 პირს ბრალი წარდგენილი აქვს ჯგუფურ ძალადობაში მონაწილეობისთვის, ხოლო 5-ს სტრატეგიული ობიექტის ხელში ჩაგდების მცდელობისთვის.

პროკურატურა ყველა ბრალდებულისთვის პატიმრობას ითხოვს, მარიამ მეყანწიშვილის შემთხვევაში კი გირაოს გამოყენებას.

4 ოქტომბრის საქმეზე დაკავებულია 62 ადამიანი, რომლებსაც ბრალად ედებათ სტრატეგიული ობიექტის ხელში ჩაგდების მცდელობა და ძალადობაში მონაწილეობა. იმ დღეს, ადგილობრივი არჩევნებისას, თბილისში გაიმართა აქცია „ხელისუფლების მშვიდობიანად დასამხობად“. აქციის მონაწილეებმა პრეზიდენტის ადმინისტრაციის ტერიტორიაზე შესვლა სცადეს, რის შემდეგაც პოლიციამ ისინი გააძევა.