ირლანდიის საზოგადოებრივი მაუწყებლის RTÉ-სა და სხვა რამდენიმე წამყვანი მედია ორგანიზაციის ოფისები ევაკუირებული იქნა მას შემდეგ, რაც მათ მიმართ მუქარები გავრცელდა.
RTÉ-ს რადიოწამყვანმა მსმენელებს განუცხადა, რომ ორგანიზაციამ მიიღო ელექტრონული წერილი, რომელშიც ეწერა, რომ „ბომბი აფეთქდებოდა 45 წუთში“.
ირლანდიური გაზეთის Irish Independent-ის თანამშრომლებს, ასევე დუბლინის რადიოსადგურების NewstalkFM-ისა და TodayFM-ის ოფისებში მომუშავეებსაც ურჩიეს, დაეტოვებინათ შენობები, ხოლო ბრიტანულმა მაუწყებელმა Sky-მაც დაადასტურა, რომ მიიღო უსაფრთხოების მუქარა.
გარდაიმ (ირლანდიის პოლიციამ) განცხადებაში აღნიშნა, რომ „აცნობიერებენ მუქარას, რომელიც მედია ორგანიზაციებს, როგორც ირლანდიაში, ისე ევროპაში, შეეხო“.
მათ დაამატეს, რომ მჭიდროდ თანამშრომლობენ დაზარალებულ ირლანდიურ მედიასაშუალებებთან და მუქარების გამოძიება დაიწყება.
ტიშოკმა (ირლანდიის პრემიერ-მინისტრმა) მიქელ მარტინმა შექმნილ ვითარებას „შემაშფოთებელი“ უწოდა და აღნიშნა, რომ მისი მთავრობის მთავარი პრიორიტეტი ირლანდიელი მოსახლეობის უსაფრთხოებაა.
„გუშინ, როგორც ჩანს, კოორდინირებული მცდელობები იყო ავიამგზავრობის შეფერხებისკენ“, – განაცხადა მან.
იგი გულისხმობდა ყალბ ბომბის მუქარებს, რომლებმაც ხუთშაბათს ევროპის მასშტაბით 21 რეისზე იმოქმედა, მათ შორის Ryanair-ისა და Aer Lingus-ის თვითმფრინავებზე.
მარტინმა RTÉ-ს განუცხადა, რომ ჯერ უცნობია, მოდიოდა თუ არა მუქარები ცალკეული პირებისგან, თუ ეს იყო „კოორდინირებული თავდასხმა“, თუმცა აღნიშნა, რომ ხელისუფლება საკითხს სერიოზულად ეკიდება.
„გარდაი, თავდაცვის ძალები, კიბერუსაფრთხოების და ავიაციის უწყებები მუშაობენ იმის დასადგენად, ვინ დგას ამ ყველაფრის უკან, ისევე როგორც მათი ევროპელი კოლეგები“, – თქვა მარტინმა.
მან დაამატა: „ეს კიდევ ერთხელ აჩვენებს, რამდენად მარტივია მსგავსი არატრადიციული ქმედებებით საზოგადოებაში არეულობის გამოწვევა და ნორმალური ფუნქციონირების დარღვევა – ქმედებები, რომლებიც მიზნად ისახავს შიშისა და შფოთვის დათესვას“.
ტანაშტემ (ვიცე-პრემიერმა) საიმონ ჰარისმა განაცხადა, რომ ეს „ძალიან სერიოზული და დინამიკური ვითარებაა“.
„ცხადია, ეს გუშინდელი და ბოლო დღეების ბომბის მუქარების ფონზე ხდება, რომლებიც ავიაკომპანიებსაც შეეხო“, – განუცხადა მან Cork 96FM-ს.
„ვფიქრობ, სამართლიანია ვთქვათ, რომ ჯერ არ ვიცით, ვინ არის პასუხისმგებელი ამ დილის მოვლენებზე“.
მან აღნიშნა, რომ ირლანდიის ხელისუფლება და კიბერუსაფრთხოების ექსპერტები „შესაბამისად ითანამშრომლებენ ევროპელ კოლეგებთან“, რათა დამნაშავეები გამოავლინონ.
RTÉ-ს ათობით თანამშრომელი დილით მაუწყებლის დონიბრუკის სათაო ოფისის წინ შეიკრიბა, სადაც გარდაიმ ძაღლების დახმარებით ჩხრეკა ჩაატარა.
ევაკუაციის დროს პირდაპირი ეთერის რამდენიმე რადიოგადაცემა შეწყდა და მაუწყებელმა წინასწარ ჩაწერილ პროგრამებზე გადაერთო, თუმცა RTÉ Radio 1 ეთერში დარჩა, რადგან მაუწყებლობას ახალი ამბების მოძრავი მანქანიდან აგრძელებდა.
მაუწყებელმა Sky-მ დაადასტურა, რომ უსაფრთხოების მუქარა მიიღო, რამდენიმე საათის შემდეგ, რაც RTÉ-მ თავისი შენობა ევაკუირა.
Comcast-ის საკუთრებაში მყოფმა მაუწყებელმა განცხადება გაავრცელა, რომელიც მისმა წამყვანმა პირდაპირ ეთერში წაიკითხა: „მაუწყებელმა ჩაატარა უსაფრთხოების შეფასება და ინფორმაცია შესაბამის უწყებებს გადასცა“.
„ჩვენთვის მთავარი პრიორიტეტია ჩვენი თანამშრომლების უსაფრთხოება და კეთილდღეობა, ამიტომ მჭიდროდ ვთანამშრომლობთ ხელისუფლებასთან, რათა ჩვენი ხალხი და ოპერაციები დაცული იყოს“.
NewstalkFM-ში მიკროფონთან დაბრუნებულმა წამყვანმა კლერ ბირნმა მსმენელებს განუცხადა, რომ მათი სადგურისთვის გაგზავნილი მუქარა ყალბი აღმოჩნდა.
„ისევე, როგორც ირლანდიის სხვა ბევრ მედიაორგანიზაციას, დღეს ჩვენც გვითხრეს, რომ შენობა დაგვეტოვებინა იმ შეტყობინების საფუძველზე, რომელიც მივიღეთ.
გარდაისთან კონტაქტი გვქონდა – ყველანი გავედით. მოგვიანებით გვითხრეს, რომ შენობაში დაბრუნება შეგვეძლო და ეს გაფრთხილება ყალბი იყო“.
სოციალურ ქსელ X-ზე NewstalkFM-მა დაწერა: „Bauer Media-ს ოფისები დილით ევაკუირებული იქნა ყალბი ბომბის მუქარის შემდეგ.
შეგვიძლია დავადასტუროთ, რომ ყველა უსაფრთხოდ არის და ეთერში ჩვეულ რეჟიმში დავბრუნდით“
