გერმანიის ჩრდილოეთ სანაპიროსთან კვირებია ჩარჩენილი კუზიანი ვეშაპის გადასარჩენად მაშველებმა ახალი ოპერაცია დაიწყეს. ისინი სპეციალურ ჰაერის ბალიშებს ვეშაპის სხეულის ქვეშ ათავსებენ, რათა ცხოველი ნელა ამოწიონ ზღვის ფსკერიდან, წყლის ზედაპირზე დააბრუნონ და შემდეგ ბუქსირით ღრმა წყლებისკენ გადაიყვანონ.
ვეშაპი, რომელსაც ადგილობრივებმა ტიმი შეარქვეს, ბალტიის ზღვაში მარტის დასაწყისში შენიშნეს და ახლა კუნძულ პოელის მახლობლად არაღრმა სანაპირო ზონაშია გაჭედილი.
ოფიციალური პირების თქმით, ეს შედარებით ნაკლებად ინვაზიური მეთოდია, თუმცა სპეციალისტები აცხადებენ, რომ ცხოველი მძიმედ დასუსტებულია და გადარჩენის შანსი დაბალია. მიუხედავად ამისა, ვეშაპს კვლავ სიცოცხლის ნიშნები აღენიშნება.
მანამდე მაშველებმა ექსკავატორებით არხიც გათხარეს, რათა ვეშაპს თავისუფლად ეცურა, თუმცა მისი ღრმა წყლებისკენ მიმართვის მცდელობა უშედეგოდ დასრულდა და ცხოველი ისევ არაღრმა ზონაში დაბრუნდა.
ექსპერტების ვარაუდით, ვეშაპი შესაძლოა ბადეში გაეხვია. ასევე აღენიშნება კანის დაზიანებები და სავარაუდო შინაგანი ტრავმები.
ვეშაპის ისტორია საერთაშორისო ყურადღების ცენტრში მოექცა, ტერიტორია კი დამცავ ზონად გამოცხადდა. უცნობია, როგორ აღმოჩნდა ეს სახეობა ბალტიის ზღვაში.
