
თბილისის მეტროს ვაგონების კაპიტალური რემონტისა და მოდერნიზაციისთვის გამოყოფილი 145 მილიონი ლარიდან, პროკურატურის ინფორმაციით, 41 მილიონზე მეტი სავარაუდოდ მიითვისეს. საქმეზე დაკავებულია 4 პირი, მათ შორის თბილისის მერიის კონტრაქტორი საწარმოს დირექტორი. გამოძიების ვერსიით, თანხების მითვისება ხელოვნურად გაზრდილი ფასებით, ყალბი დოკუმენტებითა და წინასწარ ორგანიზებული ფინანსური სქემით ხდებოდა.
საქართველოს პროკურატურის ინფორმაციით, 2017-2024 წლებში თბილისის სატრანსპორტო კომპანიის მიერ გამოცხადებული 27 ტენდერის ფარგლებში, მეტროს ვაგონების რემონტისა და მოდერნიზაციისთვის ჯამში 145.3 მილიონი ლარი გამოიყო. გამოძიების ვერსიით, ამ თანხიდან 41.1 მილიონი ლარი ორგანიზებულმა ჯგუფმა მიითვისა.
საქმეზე დაკავებულია ოთხი პირი:
პროკურატურის ინფორმაციით, ბრალდებულებმა თანხების მითვისების მიზნით შექმნეს სქემა, რომლის მეშვეობითაც მეტროს ვაგონების სარემონტოდ საჭირო დეტალები ხელოვნურად გაზრდილ ფასებში შემოჰქონდათ.
გამოძიების ვერსიით, ამ მიზნით გამოიყენებოდა შპს „საჩინო“, რომლის სახელითაც მაკომპლექტებელი ნაწილების იმპორტი ყალბი დოკუმენტებითა და გაზრდილი ღირებულებით ხორციელდებოდა. ტვირთების გადაზიდვაში კი შპს „ინტრანსი“ მონაწილეობდა.
შემდგომ იმპორტირებული დეტალები, სავარაუდოდ, ფიქციური საგადასახადო დოკუმენტების გამოყენებით, თბილისის სატრანსპორტო კომპანიას მიეწოდებოდა.
პროკურატურის მტკიცებით, მეტროს ვაგონების სარემონტოდ საჭირო დეტალების ფასები რეალურ ღირებულებასთან შედარებით სამჯერ იყო გაზრდილი.
გამოძიება მიიჩნევს, რომ სწორედ ამ მექანიზმით მოხდა მრავალმილიონიანი თანხების მითვისება.
საქმის გამოძიებას საფუძვლად თბილისის მერიის შიდა აუდიტისა და მონიტორინგის სამსახურის მიმართვა დაედო.
მეტროს ვაგონების სარემონტო ქარხანაში შესაძლო ფინანსური დარღვევების შესახებ ინფორმაცია ჯერ კიდევ 2026 წლის თებერვალში გავრცელდა, როდესაც გენერალურმა პროკურატურამ საწარმოში საგამოძიებო მოქმედებები ჩაატარა.
დაკავებულებს ბრალად ედებათ ორგანიზებული ჯგუფის მიერ, სამსახურებრივი მდგომარეობის გამოყენებით, დიდი ოდენობით თანხის მითვისება, ასევე ყალბი ოფიციალური და საგადასახადო დოკუმენტების დამზადება და გამოყენება.
პროკურატურის ინფორმაციით, წარდგენილი ბრალდებები 7-დან 11 წლამდე თავისუფლების აღკვეთას ითვალისწინებს.
სასამართლოს გადაწყვეტილებით, სამ ბრალდებულს აღკვეთის ღონისძიების სახით პატიმრობა შეეფარდა, მეოთხეს კი 2 მილიონი ლარის ოდენობის გირაო განესაზღვრა.
გამოძიება გრძელდება. პროკურატურის განცხადებით, სამართალდამცველები დანაშაულთან შესაძლო კავშირში მყოფი სხვა პირების გამოვლენაზეც მუშაობენ.
საქმეში ბრალდებულების ბრალეულობა სასამართლოს საბოლოო გადაწყვეტილებით ჯერ დადგენილი არ არის.















