
ქართულმა კომპანიამ „მეღვინეობა შუმმა“ საერთაშორისო დაჯილდოებაზე World Luxury Travel Awards სამი ჯილდო მოიპოვა. კომპანია გამარჯვებულად დასახელდა ღვინის ტურიზმის, ტურისტული დანიშნულებისა და ხელოვნებისა და კულტურული გამოცდილების ნომინაციებში.
„მეღვინეობა შუმმა“ საერთაშორისო აღიარება სამ კატეგორიაში მიიღო: Wine Destination, Tourism Destination და Art & Culture Experience. დაჯილდოება ტურიზმისა და მასპინძლობის სფეროში გამორჩეული გამოცდილების მქონე კომპანიებსა და ტურისტულ ობიექტებს აერთიანებს.

კომპანია კახეთში, წინანდალში მდებარეობს და ღვინის წარმოებას ტურისტულ, კულტურულ და საგანმანათლებლო საქმიანობას უთავსებს.
„შუმის“ ტურისტული კომპლექსი 12 ჰექტარზეა განთავსებული. აქ წარმოდგენილია კერძო ამპელოგრაფიული კოლექცია, რომელიც, კომპანიის ინფორმაციით, მსოფლიოს 49 ქვეყნიდან შეგროვებულ 2 000-ზე მეტ ვაზის ჯიშს აერთიანებს.
კომპლექსში ასევე ფუნქციონირებს ღვინის მუზეუმი. სტუმრებს შესაძლებლობა აქვთ გაეცნონ ქართული მეღვინეობის ისტორიას, ვაზის ჯიშების მრავალფეროვნებასა და ღვინის წარმოების ტრადიციულ და თანამედროვე მეთოდებს.

ტურისტული სივრცე აერთიანებს ენოგასტრონომიულ გამოცდილებას, ხელოვნების ნიმუშებსა და კულტურულ პროგრამებს. ტერიტორიაზე წარმოდგენილია ქართველი ხელოვანების სკულპტურები, ღვინო საფერავით შესრულებული ფრესკები და ტრადიციული სამშენებლო მასალებით შექმნილი არქიტექტურული სივრცეები.
კომპანიის განცხადებით, ტურისტული ინფრასტრუქტურა მუდმივად ვითარდება და ახალი შეთავაზებებით ფართოვდება.

„მეღვინეობა შუმს“ ღვინის წარმოებისა და ტურიზმის მიმართულებით საერთაშორისო ჯილდოები ადრეც აქვს მიღებული. World Luxury Travel Awards-ზე მოპოვებული სამი ახალი ჯილდო კომპანიის საერთაშორისო აღიარებების ჩამონათვალს შეემატა.
წყარო: Business Insider Georgia















