ტყიბულის მუნიციპალიტეტის სოფელ კურსებში დღეს, 12 მარტს გამთენიისას მეწყრული პროცესები გააქტიურდა. არსებული ინფორმაციით, ჩამოშლილმა მიწის მასამ დასახლებულ ტერიტორიასა და გზის სავალ ნაწილს დაარტყა.
რა ვიცით ამ დროისთვის?
საგანგებო სიტუაციების მართვის სამსახურის ინფორმაციით, ადგილზე მუშაობენ მაშველები და მიმდინარეობს მოსახლეობის ევაკუაცია.
უწყება სოფელ კურსების მცხოვრებლებს მოუწოდებს, თავი შეიკავონ გადაადგილებისგან და დაემორჩილონ შინაგან საქმეთა სამინისტროს წარმომადგენლების მითითებებს.
მეწყრის შესახებ ინფორმაცია გაავრცელა გარემოს ეროვნულმა სააგენტომაც. სააგენტოს ცნობით, ადგილზე უკვე მუშაობენ გეოლოგები, რომლებიც ვითარებას ადგილზე სწავლობენ.
რა არის ცნობილი ადგილობრივი ხელისუფლებისგან
ტყიბულის მუნიციპალიტეტის მერიის ინფორმაციით, სოფელ კურსებში ხუთი საცხოვრებელი სახლი სრულად დაინგრა. ბეროძეებისა და გოგოლაშვილების უბნებიდან ჯამში 38 ოჯახი უსაფრთხო ადგილას გადაიყვანეს.
მომხდარს მსხვერპლი არ მოჰყოლია და ამ დროისთვის დაშავებულების შესახებ ინფორმაცია არ ვრცელდება.
რადიო თავისუფლება დამატებითი დეტალების გარკვევას ცდილობს.
მეწყრული პროცესები ტყიბულის რეგიონში
გარემოს ეროვნული სააგენტოს გეოლოგიის დეპარტამენტის 2024 წლის საინფორმაციო ბიულეტენის მიხედვით, იმერეთის რეგიონში ყველაზე გავრცელებულ საშიშ გეოლოგიურ პროცესს მეწყრები წარმოადგენს. ასეთი პროცესები ხშირად საფრთხეს უქმნის საცხოვრებელ სახლებს, გზებსა და სხვადასხვა ინფრასტრუქტურულ ობიექტს.
ანგარიშში ასევე აღნიშნულია, რომ ტყიბულის მუნიციპალიტეტში ყველაზე ხშირი ბუნებრივი საფრთხე სწორედ მეწყრებია, ხოლო შედარებით იშვიათად ფიქსირდება ქვათაცვენა.
წყარო : რადიო თავისუფლება
