ბრიუსელის თავისუფალი უნივერსიტეტის მონაცემთა ანალიზის ლაბორატორიის მკვლევრებმა გამოაქვეყნეს ნაშრომი, რომელიც მიუთითებს, რომ თანამედროვე ენობრივ მოდელებს უკვე შეუძლიათ ორიგინალური მათემატიკური დამტკიცებების შექმნა. კვლევის ფარგლებში გამოყენებული იყო ChatGPT-ის ახალი ვერსია, სახელწოდებით ChatGPT-5.2 Thinking.

კვლევის ერთ-ერთი მთავარი შედეგი უკავშირდება 2024 წელს მათემატიკოსების, ჟანისა და თენგის მიერ ჩამოყალიბებულ ჰიპოთეზას. ჰიპოთეზა მათემატიკაში ნიშნავს ვარაუდს, რომელიც მრავალი მაგალითით ან დაკვირვებით დასტურდება, თუმცა საბოლოო და ფორმალური დამტკიცება ჯერ არ არსებობს. სწორედ ასეთი ამოცანის ამოხსნას შეეცადა ხელოვნური ინტელექტი და, მკვლევრების თქმით, მან შექმნა დამტკიცების ვერსია, რომელიც აღნიშნულ ჰიპოთეზას ხსნის.

მნიშვნელოვანია, რომ ეს პროცესი შედარებით მოკლე დროში განხორციელდა. ავტორების ინფორმაციით, საბოლოო შედეგამდე მისასვლელად სულ შვიდი კომუნიკაცია და დამტკიცების ოთხი განსხვავებული ვერსია იყო საჭირო. ხელოვნურმა ინტელექტმა განსაკუთრებით მნიშვნელოვანი როლი ითამაშა იდეების გენერირებასა და დამტკიცების სტრუქტურის ჩამოყალიბებაში, ხოლო ადამიანმა ექსპერტებმა გააკეთეს საბოლოო შემოწმება და არგუმენტების გადამოწმება.

კვლევაში ხაზგასმულია, რომ მოდელმა დამტკიცების ძირითადი ნაწილი დამოუკიდებლად შექმნა და ადამიანის ჩარევა მინიმალური იყო. ეს ფაქტი კიდევ ერთხელ აჩვენებს, რომ ხელოვნური ინტელექტი უკვე გადადის უბრალოდ დამხმარე ინსტრუმენტიდან უფრო აქტიურ მონაწილედ სამეცნიერო პროცესში.

მკვლევრები ამ პროცესს უფრო ფართო კონტექსტში განიხილავენ და მას უკავშირებენ ახალ მიდგომას, რომელსაც vibe proving ეწოდება. ეს არის მეთოდი, სადაც ენობრივ მოდელებთან მიმდინარეობს მაღალი დონის თეორიული დიალოგი და მათ რთული ამოცანების გადაჭრაში იყენებენ. მათი შეფასებით, არსებობს შესაძლებლობა, რომ ეს მიმართულება ისეთივე სწრაფად განვითარდეს, როგორც ბოლო პერიოდში განვითარდა ე. წ. vibe coding, რომელიც პროგრამირების პროცესში AI-ის გამოყენებას გულისხმობს.

მიუხედავად მიღწეული შედეგებისა, მკვლევრები ხაზს უსვამენ, რომ საბოლოო გადამოწმება კვლავ ადამიანის პასუხისმგებლობაა. თუმცა ისინი ვარაუდობენ, რომ მომავალში ხელოვნური ინტელექტი უფრო აქტიურად ჩაერთვება მათემატიკაში და მნიშვნელოვნად დააჩქარებს ამ დარგის განვითარებას.

ნაშრომი ამ ეტაპზე რეცენზირებული არ არის და ხელმისაწვდომია პრეპრინტების პლატფორმაზე arXiv, სადაც მას დეტალურად შეიძლება გაეცნოს სამეცნიერო საზოგადოება.

წყარო : On.ge