რუსეთი უკრაინაში ომის დასრულების პირობებზე მოლაპარაკებების განახლებას მხოლოდ მას შემდეგ აპირებს, რაც დონეცკის ოლქს სრულად დაიპყრობს. ამის შესახებ სააგენტო Bloomberg-ი კრემლთან დაახლოებულ ორ წყაროზე დაყრდნობით წერს.

გამოცემის ინფორმაციით, რუსეთის თავდაცვის სამინისტრომ პრეზიდენტ ვლადიმირ პუტინს განუცხადა, რომ დონეცკის ოლქზე სრული კონტროლის დამყარებას 2026 წლის ბოლომდე შეძლებს.

თუმცა, Bloomberg-ის კიდევ ერთი წყაროს თანახმად, რომელიც რუსეთის თავდაცვის სამინისტროსთან არის დაახლოებული, ბევრი სამხედრო ამ ვადას არარეალისტურად მიიჩნევს. მათი შეფასებით, დონეცკის ოლქის სრულად დაპყრობა შესაძლოა მხოლოდ 2027 წელს გახდეს შესაძლებელი.

Bloomberg-ის წყაროების ცნობით, პუტინი არა მხოლოდ დონბასზე სრული კონტროლის მოპოვებას, არამედ უკრაინის სუმისა და ხარკოვის ოლქებში დაკავებული ტერიტორიების შენარჩუნებასაც გეგმავს. მოსკოვი ამ ტერიტორიებს ე.წ. ბუფერულ ზონებად განიხილავს.

რუსეთის პრეზიდენტმა უკრაინისთვის ტერიტორიების დაბრუნების იდეა უარყო. კრემლში მიიჩნევენ, რომ შეერთებულმა შტატებმა აღარ დაუჭირა მხარი იმ არაფორმალურ შეთანხმებას, რომელიც, რუსეთის მტკიცებით, პრეზიდენტებს, დონალდ ტრამპსა და ვლადიმირ პუტინს შორის 2025 წლის აგვისტოში, ალასკის ქალაქ ანკორიჯში გამართულ შეხვედრაზე შედგა.

აშშ-ის ოფიციალურმა პირებმა არაერთხელ განაცხადეს, რომ ანკორიჯის შეხვედრაზე მხოლოდ წინადადებები განიხილეს და რაიმე შეთანხმება არ გაფორმებულა. დასავლური მედიასაშუალებების ინფორმირებული წყაროების თანახმად, ამერიკული მხარის წინადადება ითვალისწინებდა ომის შეწყვეტას დონბასზე რუსეთის სრული კონტროლის სანაცვლოდ.

უკრაინას არაერთხელ განუცხადებია, რომ რუსეთისთვის საკუთარი ტერიტორიების დათმობას არ აპირებს.

უკრაინაში ომის დასრულების პირობებზე აშშ-ის ინიციატივით სამმხრივი მოლაპარაკებები 2026 წლის იანვარში დაიწყო. პროცესში შეერთებული შტატების, უკრაინისა და რუსეთის წარმომადგენლები მონაწილეობდნენ.

იანვარსა და თებერვალში მოლაპარაკებების სამი რაუნდი გაიმართა. პირველი ორი შეხვედრა არაბთა გაერთიანებული საამიროების დედაქალაქ აბუ-დაბიში ჩატარდა, მესამე კი შვეიცარიის ქალაქ ჟენევაში.