უკრაინის პრეზიდენტმა ვოლოდიმირ ზელენსკიმ დაადასტურა, რომ 22 ივლისს უკრაინის თავდაცვის ძალებმა რუსეთის კრასნოდარისა და სტავროპოლის მხარეებში ლოგისტიკურ ცენტრებსა და ნავთობის ბაზას დაარტყეს.

დარტყმებთან დაკავშირებით სოციალურ ქსელში გავრცელებულ განცხადებაში ზელენსკის კომპანია Wildberries-ი არ უხსენებია. თუმცა, სწორედ ამ კომპანიის ლოგისტიკურ ცენტრებზე განხორციელდა დრონებით შეტევა სტავროპოლის მხარის ქალაქ ნევინომისკსა და კრასნოდარის მხარის ადმინისტრაციულ ცენტრში, ქალაქ კრასნოდარში.

უკრაინის პრეზიდენტის განცხადებით, სამიზნე იყო ლოგისტიკური ცენტრები, რომლებიც რუსეთის არმიას დრონების მაკომპლექტებლებით, სანავიგაციო დანადგარებითა და სხვა მოწყობილობებით ამარაგებენ. ასევე დარტყმა განხორციელდა ნავთობის ბაზაზე, ხოლო აზოვისა და შავი ზღვის აკვატორიაში დაზიანდა რუსეთის ე.წ. ჩრდილოვანი ფლოტის ერთი ტანკერი და კიდევ ოთხი სატვირთო გემი.

22 ივლისს, Wildberries-ის ლოგისტიკური ცენტრების გარდა, უკრაინის თავდაცვის ძალებმა კრასნოდარის მხარის ქალაქ არმავირში მდებარე ნავთობის ბაზასაც შეუტიეს. ადგილობრივი ხელისუფლების წარმომადგენელთა ინფორმაციით, შეტევას ერთი ადამიანი ემსხვერპლა.

კრასნოდარსა და ნევინომისკში მდებარე ლოგისტიკურ ცენტრებზე თავდასხმების შედეგად, საერთო ჯამში, 15 ადამიანი დაშავდა. გავრცელებული ცნობებით, რამდენიმე მათგანის მდგომარეობა მძიმეა.

ვოლოდიმირ ზელენსკის განცხადებით, უკრაინა „ომს სრულიად სამართლიანად აბრუნებს სახლში, რუსეთში“ და მოსკოვი უნდა აიძულონ, დიპლომატიურ გზაზე გადავიდეს.

უკრაინის თავდაცვის ძალებმა კომპანია Wildberries-ის საწყობებზე უპილოტო საფრენი აპარატებით იერიში 18 და 20 ივლისსაც მიიტანეს. თავდასხმები მოსკოვისა და ტამბოვის ოლქებში განხორციელდა.

Wildberries-ი 2004 წელს დაარსებული რუსეთის უდიდესი ონლაინმარკეტპლეისია. პლატფორმას ყოველთვიურად 79 მილიონზე მეტი აქტიური მომხმარებელი ჰყავს. მისი გამყიდველების წლიურმა ბრუნვამ 2,9 ტრილიონ რუბლს გადააჭარბა. კომპანიის ქსელი 90 ათასზე მეტ გაცემის პუნქტს აერთიანებს და დღეში 20 მილიონზე მეტ შეკვეთას ამუშავებს. სწორედ ამ მასშტაბის გამო Wildberries-ი რუსეთის შიდა ვაჭრობისა და ლოგისტიკის ერთ-ერთ უმნიშვნელოვანეს ინფრასტრუქტურად მიიჩნევა.

22 ივლისს, სტავროპოლისა და კრასნოდარის მხარეებში Wildberries-ის ლოგისტიკურ ცენტრებზე დარტყმის შემდეგ, რუსეთის საგამოძიებო კომიტეტმა სისხლის სამართლის საქმე „ტერორისტული აქტის“ მუხლით აღძრა.

რუსეთის ხელისუფლება „ტერორისტულ აქტად“ აფასებს უკრაინის თავდაცვის ძალების ყველა შეტევას რუსეთის ტერიტორიასა და ანექსირებულ ყირიმში მდებარე სამრეწველო ობიექტებზე.

უკრაინის ხელისუფლება კი ამ თავდასხმებს რუსეთის მიერ უკრაინასა და მის მოსახლეობაზე განხორციელებული ყოველდღიური დარტყმების „სამართლიან პასუხად“ მიიჩნევს. პრეზიდენტ ზელენსკის არაერთხელ განუცხადებია, რომ მოსკოვის მიერ გაჩაღებული ომის შედეგები რუსეთშიც უნდა იგრძნონ, რათა ქვეყანა ომის დასრულებაზე აიძულონ.