Microsoft-მა წარადგინა ახალი ხელოვნური ინტელექტის აგენტები, რომლებიც კომპანიებს ციფრული ტრანსფორმაციის პროცესში ეხმარება სწრაფად, ეფექტურად და ნაკლები სირთულით.
კომპანიის Azure პლატფორმის მთავარი პროდუქტის ოფიცრის, ჯერემი უინტერის განცხადებით, ეს სიახლეები მიზნად ისახავს IT გუნდებისა და დეველოპერების ერთიან სამუშაო პროცესში გაერთიანებას და სისტემების მოდერნიზაციის გამარტივებას.
გასულ კვირას წარმოდგენილი Azure Copilot Migration Agent უკვე საჯარო ტესტირების რეჟიმშია. ის კომპანიებს ეხმარება AI-ის გამოყენებაში მთელ პროცესში, აღმოჩენიდან და შეფასებიდან დაწყებული, დაგეგმვითა და დანერგვით დასრულებული.
უინტერის თქმით, ეს აგენტი „მიგრაციას ერთჯერადი პროექტიდან უწყვეტ მოდერნიზაციის პროცესად აქცევს“ და შესაძლებელია მისი გამოყენება კრიტიკულად მნიშვნელოვანი სერვერების, აპლიკაციებისა და მონაცემთა ბაზების უმეტესობაზე. სისტემა იყენებს უკვე არსებულ მონაცემებს ინფრასტრუქტურის შესახებ, რათა შექმნას სრული სურათი რა რესურსებია, როგორ მუშაობს, რა ღირს და რა არის რეალურად გასაუმჯობესებელი.
ამის შედეგად, ის პროცესები, რომლებიც ადრე თვეებს მოითხოვდა, ახლა რამდენიმე წუთში სრულდება მხოლოდ მოკლე კომუნიკაციით AI აგენტთან, რომელიც მონაცემებზე დაფუძნებულ გეგმას ქმნის.
ამასთან, GitHub Copilot-ის ახალი აგენტები დეველოპერებს საშუალებას აძლევს, ძველი აპლიკაციები გადაიყვანონ თანამედროვე, ღრუბელზე და AI-ზე ორიენტირებულ სისტემებად. ახალი modernization agent ერთდროულად ახორციელებს კოდის შეფასებას, ქმნის ინდივიდუალურ განახლების გეგმებს და ავტომატურად ასრულებს საჭირო ტექნიკურ განახლებებს.
Microsoft-ის განცხადებით, Azure Copilot-ისა და GitHub Copilot-ის ერთობლივი მუშაობა წყვეტს პრობლემას, რომელიც ხშირად არსებობდა, როცა კოდი განახლებული იყო, მაგრამ გაურკვეველი რჩებოდა, როგორ იმუშავებდა ის ახალ ინფრასტრუქტურაში.
კომპანიაში აცხადებენ, რომ ახლა იწყება გადასვლა ერთჯერადი AI ინსტრუმენტებიდან სისტემურ და განმეორებად პროცესებზე, რაც კომპანიებს საშუალებას მისცემს, მოდერნიზაცია უფრო მასშტაბურად და სტაბილურად განახორციელონ.
ამასთან ერთად, Microsoft-მა წარადგინა Fireworks AI-ის საჯარო ვერსია Microsoft Foundry პლატფორმაზე. ეს არის ერთიანი გარემო, რომელიც დეველოპერებს აძლევს შესაძლებლობას შექმნან, განათავსონ და მართონ AI აპლიკაციები.
Fireworks AI უზრუნველყოფს ღია მოდელების გამოყენებას და ოპტიმიზებულ ინფრასტრუქტურას, მათ შორის ისეთი მოდელებისთვის, როგორიცაა DeepSeek V3.2, OpenAI-ის gpt-oss-120b და Moonshot AI-ის Kimi K2.5.
წყარო : AI Business
