მოსკოვში უკვე ერთ კვირაზე მეტია, მოსახლეობა მასშტაბურ პრობლემებს უჩივის მობილურ კავშირსა და ინტერნეტთან დაკავშირებით. თავდაპირველად შეფერხებები სამხრეთის ადმინისტრაციულ ოკრუგში დაფიქსირდა, თუმცა მალევე გავრცელდა დედაქალაქის სხვა ნაწილებზეც და დღეს უკვე პრობლემები აღინიშნება ყველა 12 ოკრუგში.

მოსკოველების თქმით, ხშირ შემთხვევაში ტელეფონები მხოლოდ „გადაუდებელი ზარების“ რეჟიმში მუშაობს, ხოლო ინტერნეტზე წვდომა თითქმის შეუძლებელია. შეფერხებები შეეხო ყველა მსხვილ ოპერატორს — MTS-ს, „ბილაინს“, „მეგაფონსა“ და Tele2-ს, რაც მიუთითებს, რომ პრობლემა არა კონკრეტულ კომპანიას, არამედ გეოგრაფიულ ზონებს უკავშირდება.

შეზღუდვებმა სერიოზული გავლენა მოახდინა როგორც მოქალაქეებზე, ისე ბიზნესზე. ადამიანები ვერ სარგებლობენ ტაქსის სერვისებით, ვერ ახორციელებენ ონლაინ გადახდებს და ხშირად იძულებულნი არიან ნაღდი ფული გამოიყენონ. მცირე ბიზნესები, განსაკუთრებით კაფეები და მაღაზიები, შემოსავლების მკვეთრ შემცირებაზე საუბრობენ. არსებული შეფასებით, მხოლოდ რამდენიმე დღეში ბიზნესის ზარალმა რამდენიმე მილიარდ რუბლს მიაღწია.

ამ ფონზე მნიშვნელოვნად გაიზარდა მოთხოვნა ალტერნატიულ კომუნიკაციის საშუალებებზე — რადიოებზე, პეიჯერებსა და სტაციონარულ ტელეფონებზე. ასევე გაიზარდა VPN-ით აღჭურვილი მოწყობილობების მოთხოვნა, თუმცა მათი ფასიც საგრძნობლად გაძვირდა.

ხელისუფლება მიმდინარე პროცესს უსაფრთხოების ზომებით ხსნის. კრემლის წარმომადგენლების განცხადებით, კომუნიკაციის შეზღუდვა კანონმდებლობის ფარგლებში ხორციელდება და მიზნად ქვეყნის უსაფრთხოების დაცვას ისახავს. პარალელურად იგეგმება ე.წ. „თეთრი სიის“ გაფართოება, თუმცა ამჟამად ბევრი სერვისი უკვე სრულად დაბლოკილია.

ახალი კანონმდებლობით, ტელეკომუნიკაციების ოპერატორები ვალდებულნი არიან, სპეცსამსახურების მოთხოვნის შემთხვევაში, მომხმარებლებს მომსახურება შეუზღუდონ და ამაზე პასუხისმგებლობაც აღარ ეკისრებათ. ექსპერტები აღნიშნავენ, რომ მომავალში შესაძლოა კიდევ უფრო მკაცრი კონტროლი დაწესდეს, მათ შორის VPN-ების გამოყენებაზეც.

რეგიონების მოსახლეობა კი აღნიშნავს, რომ მსგავსი მდგომარეობა მათთვის ახალი არ არის — ბევრ რეგიონში ინტერნეტის შეზღუდვები უკვე დიდი ხანია ყოველდღიურ რეალობად იქცა.

წყარო : რადიო თავისუფლება