სურსათის ეროვნული სააგენტოს სამეგრელოსა და იმერეთის რეგიონული დეპარტამენტების წარმომადგენლებმა უკანონოდ მოქმედი სასაკლაოები გამოავლინეს. დარღვევები დაფიქსირდა თერჯოლასა და ზესტაფონში.

კერძოდ, ინდმეწარმე გ.ზ. (თერჯოლის რაიონი, სოფელი ღვანკითი) და ფიზიკური პირი ს.მ. (ზესტაფონი, მეორე სვირი) ცხოველებს კლავდნენ სააგენტოს სავალდებულო აღიარებისა და ვეტერინარული კონტროლის გარეშე.

შემოწმების შედეგად ორივე ობიექტზე გამოვლინდა სერიოზული დარღვევები. თერჯოლაში მდებარე არალეგალურ სასაკლაოზე დალუქულია 70 კილოგრამზე მეტი გოჭისა და მსხვილფეხა საქონლის ხორცი, რომელიც ვეტერინარული ზედამხედველობის გარეშე იყო დაკლული და შემდგომ განადგურებას ექვემდებარება. ზესტაფონში კი დალუქულია 8 კილოგრამი ბოცვრის ხორცი.

დამრღვევი პირები დაჯარიმდნენ, ხოლო საწარმოო საქმიანობა დროებით შეჩერდა, ვიდრე არსებული შეუსაბამობები სრულად არ აღმოიფხვრება. კანონის შესაბამისად, აღმოჩენილი პროდუქცია დალუქულია.

სურსათის ეროვნულ სააგენტოში აცხადებენ, რომ ვეტერინარული კონტროლის გარეშე ცხოველთა დაკვლა სერიოზულ საფრთხეს წარმოადგენს ადამიანის ჯანმრთელობისთვის. მსგავსი პრაქტიკა ზრდის ზოონოზური დაავადებების, მათ შორის ჯილეხისა და ბრუცელოზის გავრცელების რისკს, ასევე შესაძლებელია საკვებით მოწამვლის შემთხვევების მატება.

სააგენტო მოუწოდებს მოქალაქეებს, თავი შეიკავონ არალეგალური სასაკლაოების გამოყენებისგან და დაიცვან სურსათის უსაფრთხოების ნორმები.

წყარო : Info Imereti