9 აპრილს, რუსთაველის გამზირზე მდებარე მემორიალთან, საქართველოში აკრედიტებულმა დიპლომატიური კორპუსის წარმომადგენლებმა 1989 წლის ტრაგედიის მსხვერპლთა ხსოვნას პატივი მიაგეს და ადგილზე ყვავილები მიიტანეს.

ერთ-ერთი პირველი მემორიალთან აშშ-ის ელჩის მოვალეობის შემსრულებელი ალან პერსელი მივიდა. აშშ-ის საელჩოს განცხადებით, 9 აპრილი საბჭოთა არმიის სისასტიკის შეხსენებაა და იმ ადამიანების ხსოვნის დღეა, ვინც საქართველოს თავისუფლებისთვის მშვიდობიან პროტესტში მონაწილეობდა.

ევროკავშირის ელჩი პაველ ჰერჩინსკი ადგილზე ჩეხეთის ელჩთან ერთად მივიდა. ევროკავშირის განცხადებით, 9 აპრილი სიმბოლოა თავისუფლების, ღირსებისა და დამოუკიდებლობისთვის ბრძოლისა და კიდევ ერთხელ ადასტურებს საქართველოს სუვერენიტეტის მხარდაჭერას. ანალოგიური განცხადებები გაავრცელეს ჩეხეთის, დანიის, ბალტიისა და ნორდიკული ქვეყნების ელჩებმაც.

გერმანიის ელჩმა აღნიშნა, რომ 9 აპრილის მოვლენები მსოფლიო თავისუფლებისთვის ბრძოლას უკავშირდება და დღესაც აქტუალურია. პოლონეთის საელჩოს განცხადებით კი, საქართველო და პოლონეთი ისტორიულად ერთად იბრძოდნენ საბჭოთა რეჟიმის წინააღმდეგ და დღესაც საერთო ღირებულებებს იზიარებენ.

მემორიალი გვირგვინებით შეამკეს ასევე სრულიად საქართველოს მუსლიმთა სამმართველოს წარმომადგენლებმა, რომლებმაც გმირთა ხსოვნას პატივი მიაგეს.

1989 წლის 9 აპრილს საბჭოთა ჯარმა თბილისში მშვიდობიანი დემონსტრაცია ძალის გამოყენებით დაშალა, რასაც 21 ადამიანის სიცოცხლე შეეწირა და ასობით ადამიანი დაშავდა. ორი წლის შემდეგ, სწორედ ამ დღეს საქართველომ დამოუკიდებლობის აღდგენა გამოაცხადა.