მსოფლიო პოპვარსკვლავი დუა ლიპა და ბრიტანელი მსახიობი კალუმ ტერნერი ოფიციალურად დაქორწინდნენ. წყვილმა ქორწილი ლონდონში, ისტორიულ Old Marylebone Town Hall-ში გამართა, სადაც მხოლოდ ოჯახის წევრები და უახლოესი მეგობრები იყვნენ მიწვეულნი.
ქორწილის შესახებ ინფორმაცია თავდაპირველად ბრიტანულმა მედიამ გაავრცელა. გავრცელებულ ფოტოებში ახალდაქორწინებული წყვილი ცერემონიის დასრულების შემდეგ ხელჩაკიდებული ტოვებს შენობას, ხოლო სტუმრები მათ ყვავილების ფურცლებს აყრიან.
დუა ლიპას ქორწილისთვის სპეციალურად შეკერილი თეთრი Schiaparelli-ის კოსტიუმი ეცვა, რომელიც მოდის სახლის კრეატიულმა დირექტორმა დენიელ როუზბერიმ შექმნა. ლუქს ავსებდა ქუდი, თეთრი ხელთათმანები და Christian Louboutin-ის ფეხსაცმელი. კალუმ ტერნერმა კი კლასიკური მუქი ლურჯი Ferragamo-ს ორღილებიანი კოსტიუმი შეარჩია.
თუმცა, ლონდონის ცერემონია, როგორც ჩანს, მხოლოდ პირველი ეტაპი იყო. უცხოური მედიის ინფორმაციით, წყვილი უახლოეს დღეებში სიცილიის ქალაქ პალერმოში სამდღიან საქორწილო ზეიმსაც გამართავს. სავარაუდო სტუმრებს შორის სახელდებიან ელტონ ჯონი, ჩარლი XCX, მარკ რონსონი, დონატელა ვერსაჩე და ფრანგი დიზაინერი სიმონ პორტ ჟაკმუსი.
დუა ლიპამ და კალუმ ტერნერმა ნიშნობის შესახებ ოფიციალურად 2025 წელს ისაუბრეს. ბრიტანულ Vogue-თან ინტერვიუში მომღერალმა განაცხადა, რომ მათი ურთიერთობის შემდეგი ეტაპი მისთვის განსაკუთრებული ემოციური მნიშვნელობის მატარებელია.
წყვილის სიყვარულის ისტორია 2024 წლის დასაწყისში დაიწყო. ისინი პირველად ლონდონში შეხვდნენ, მოგვიანებით კი ლოს-ანჯელესში გამართულ წვეულებაზე უფრო დაახლოვდნენ. როგორც თავად იხსენებენ, მათ შორის ერთ-ერთი პირველი დამაკავშირებელი ფაქტორი ის იყო, რომ ორივე ერთსა და იმავე წიგნს - ერნან დიასის „Trust“-ს კითხულობდა.
2024 წელს დუა ლიპა და კალუმ ტერნერი არაერთ ღონისძიებაზე გამოჩნდნენ ერთად, მათ შორის Grammy-ს, BAFTA-სა და BRIT Awards-ის შემდგომ წვეულებებზე. წყვილის ოფიციალური დებიუტი წითელ ხალიჩაზე 2025 წლის Met Gala-ზე შედგა.
ქორწილიდან რამდენიმე დღის შემდეგ ისინი უკვე ლონდონის ერთ-ერთ პარკში გადაიღეს, სადაც ძაღლთან ერთად სეირნობდნენ. ფოტოების მიხედვით, ახალდაქორწინებულები მედიის ყურადღებისგან მოშორებით, მშვიდ ოჯახურ დღეებს ატარებენ.
მიუხედავად იმისა, რომ მათი ურთიერთობა მსოფლიოს ერთ-ერთი ყველაზე განხილვადი ვარსკვლავური რომანია, დუა ლიპა და კალუმ ტერნერი ცდილობენ პირადი ცხოვრება მაქსიმალურად დაცულად შეინარჩუნონ. სწორედ ამიტომ, მათი ქორწილიც მოულოდნელი აღმოჩნდა როგორც გულშემატკივრებისთვის, ისე მედიისთვის.
ახლა ყურადღება სიცილიისკენაა მიმართული, სადაც, გავრცელებული ინფორმაციით, წყვილის მთავარი საქორწილო ზეიმი გაიმართება. მოდის ექსპერტები უკვე ვარაუდობენ, რომ დუა ლიპა შესაძლოა მეორე საქორწილო კაბითაც გამოჩნდეს, რომლის ავტორიც მისი ახლო მეგობარი და ცნობილი დიზაინერი სიმონ პორტ ჟაკმუსი იქნება.
