იერუსალიმში, ქრისტეს აღდგომის ტაძარში, ტრადიციული წმინდა ცეცხლის რიტუალი გაიმართა. მაცხოვრის საფლავზე მდებარე კუვუკლიიდან ცეცხლი იერუსალიმისა და სრულიად პალესტინის პატრიარქმა გამოაბრძანა.

ეს ცეცხლი ხშირად მოიხსენიება როგორც „ჭეშმარიტების ნათელი“ და სიმბოლურად ქრისტეს აღდგომას აღნიშნავს.

რიტუალზე დასასწრებად იერუსალიმში ყოველწლიურად ათასობით მომლოცველი ჩადის მსოფლიოს სხვადასხვა ქვეყნიდან, მათ შორის საქართველოდანაც.

ქართულ დელეგაციასაც აქვს წარმომადგენლობა იერუსალიმში. მათი მისიაა, ჩამოიტანონ წმინდა ცეცხლი საქართველოში და გაავრცელონ იგი ეკლესიებსა და მონასტრებში.

ცეცხლი პირველად სიონის საკათედრო ტაძარში მიიტანება, სადაც სააღდგომო ლიტურგიას აღავლენს საპატრიარქო ტახტის მოსაყდრე, შიო მუჯირი.

მიუხედავად უსაფრთხოების მკაცრი ზომებისა, ტაძარში ათასობით მორწმუნე შეიკრიბა. აღდგომის ტაძარი ომის გამო 40 დღის განმავლობაში დახურული იყო, თუმცა დღესასწაულის წინ ისრაელის ხელისუფლებამ მისი გახსნა გადაწყვიტა.

უსაფრთხოების ზომების ფარგლებში ტაძარში ერთდროულად მაქსიმუმ 2000 ადამიანს უშვებენ.

წმინდა ცეცხლი იერუსალიმიდან თბილისში წელსაც ჩამოიტანება, როგორც ეს ტრადიციად არის ქცეული.

მართლმადიდებლური რწმენით, ეს ერთ-ერთი უმნიშვნელოვანესი საიდუმლოა, რომელიც ყოველწლიურად დიდ შაბათს, აღდგომის წინ აღესრულება მაცხოვრის საფლავზე.

ისტორიული გადმოცემების მიხედვით, ეს რიტუალი იერუსალიმში უკვე III საუკუნიდან სრულდება.

წელს, ცერემონიის წინ, უსაფრთხოების განსაკუთრებული ზომები იყო მიღებული და პოლიცია ეკლესიის წარმომადგენლებთან კოორდინაციით დიდი ხნის განმავლობაში ემზადებოდა.