„ქართულ ოცნებასთან“ დაკავშირებული მოძრაობა „ერთიანი ნეიტრალური საქართველო“ ეუთო/ოდირის მოსკოვის მექანიზმის ანგარიშთან დაკავშირებით განცხადებას ავრცელებს. მათი თქმით, აღარ არის საკმარისი ევრობიუროკრატიის მხოლოდ კრიტიკა და საჭიროა იმ საერთაშორისო შეთანხმებებისა და ვალდებულებებისგან გათავისუფლება, რომლებიც, მათი შეფასებით, საქართველოს სახელმწიფოებრიობის წინააღმდეგ გამოიყენება.

მოძრაობის განცხადებით, ეუთოს მოსკოვის მექანიზმის ანგარიში კიდევ ერთხელ აჩვენებს, რომ საერთაშორისო ორგანიზაციები და შეთანხმებები მნიშვნელოვნად კარგავს ფუნქციას. მათი შეფასებით, დოკუმენტი მთლიანობაში არასწორ ინფორმაციას ეფუძნება და ასახავს ისეთ ხედვას, რომლის მიხედვითაც ადამიანის უფლებები ლგბტ პროპაგანდასთან არის გაიგივებული, ხოლო დემოკრატია – „კოლექტიური ნაცმოძრაობის“ მმართველობასთან.

განცხადებაში ასევე ნათქვამია, რომ საერთაშორისო შეთანხმებების სისტემა მსოფლიოში ეტაპობრივად სუსტდება, რადგან, მათი აზრით, ირღვევა ის მსოფლიო წესრიგი, რომლის საფუძველზეც ეს ფორმატები შეიქმნა. ისინი მაგალითად ასახელებენ ფაქტს, რომ ბოლო პერიოდში აშშ-მ ათობით საერთაშორისო ხელშეკრულება დატოვა.

„ერთიანი ნეიტრალური საქართველოს“ შეფასებით, ეუთო, ვენეციის კომისია და სხვა მსგავსი სტრუქტურები რეალურად იქცა გავლენიანი ოლიგარქიული ჯგუფების ინსტრუმენტად, რომლებიც მათ პოლიტიკურ და იდეოლოგიურ მიზნებს ემსახურება.

მოძრაობა ასევე აცხადებს, რომ საქართველოში ხელისუფლების შეცვლის სცენარი კვლავ აქტუალურია და ეუთოს დასკვნა, ისევე როგორც ევროპარლამენტის რეზოლუციები, მათი აზრით, შეიძლება გამოყენებულ იქნას რევოლუციური პროცესების გასაძლიერებლად.

ამ ფონზე, ორგანიზაციის პოზიციით, საქართველომ უნდა განიხილოს იმ საერთაშორისო შეთანხმებებისა და ორგანიზაციების დატოვება, რომლებიც, მათი შეფასებით, შანტაჟის ინსტრუმენტად იქცა. ისინი კითხვის ნიშნებს სვამენ იმასთან დაკავშირებითაც, თუ როგორ უნდა შეასრულოს ქვეყანამ ეს ვალდებულებები მაშინ, როცა, მათი თქმით, საქართველოსგან ითხოვენ ტრადიციულ ღირებულებებზე, სუვერენიტეტსა და რწმენაზე უარის თქმას.

შეგახსენებთ, რომ ეუთოს მოსკოვის მექანიზმი 24 წევრმა ქვეყანამ 29 იანვარს აამოქმედა, რათა საქართველოში ადამიანის უფლებების შესაძლო დარღვევები შეესწავლათ. ამისთვის შეიქმნა დამოუკიდებელი ექსპერტებისგან დაკომპლექტებული ფაქტების დამდგენი მისია, რომელმაც ვითარება შეისწავლა და შესაბამისი რეკომენდაციები გასცა.

დაახლოებით 200-გვერდიან ანგარიშში მიმოხილულია 2024 წლის დასაწყისიდან დღემდე საქართველოში არსებული პოლიტიკური და დემოკრატიული ვითარება. დოკუმენტში საუბარია დემოკრატიის უკუსვლაზე, ადამიანის უფლებებისა და მედიის მდგომარეობის გაუარესებაზე, საპროტესტო აქციების მონაწილეების და ოპოზიციის დევნაზე, განსხვავებული აზრის მიმართ რეპრესიებზე, პოლიტიკური პატიმრების არსებობაზე და რეპრესიულ კანონმდებლობაზე.

ეუთოს მოსკოვის მექანიზმი 1991 წელს შეიქმნა და მისი მიზანია ადამიანის უფლებების შესაძლო დარღვევების დამოუკიდებელი გამოძიება. მექანიზმი ეუთოს წევრ ქვეყნებს საშუალებას აძლევს, სერიოზული ბრალდებების შემთხვევაში დაიწყონ გამოძიება მაშინაც კი, თუ შესაბამისი ქვეყნის ხელისუფლება ამას არ ეთანხმება.

ამ დრომდე ეუთოს ეს მექანიზმი 16-ჯერ აქვს გამოყენებული, ხოლო საქართველოს შემთხვევა რიგით მეჩვიდმეტეა. მანამდე იგი გამოიყენებოდა, მათ შორის, ხორვატიასა და ბოსნიაში მოქალაქეებზე თავდასხმების გამოძიებისთვის, ასევე თურქმენეთში, ბელარუსსა და ჩეჩნეთში არსებული ვითარების შესასწავლად.