იემენში ჰუსიტებთან დაკავშირებული მედია იუწყება, რომ საუდის არაბეთის ავიადარტყმებს სულ მცირე 25 ადამიანი, მათ შორის ქალები და ბავშვები, ემსხვერპლა.
საუდის არაბეთის ხელმძღვანელობით მოქმედ კოალიციას, რომელიც იემენის საერთაშორისოდ აღიარებულ მთავრობას უჭერს მხარს, ამ დრომდე კომენტარი არ გაუკეთებია.
ჰუსიტების მიერ მართულმა ტელეკომპანია „ალ-მასირაჰ“-მა პირდაპირ ეთერში აჩვენა, როგორ გამოჰყავდათ მაშველებს რამდენიმე შენობის ნანგრევებიდან დაღუპულთა ცხედრები ალ-შარიაში, ქალაქში, რომელიც დედაქალაქ სანას აღმოსავლეთით მდებარეობს.
ნანგრევებიდან ამოყვანილთა შორის ბავშვების ცხედრებიც ჩანს.
ტელეკომპანიამ ასევე აჩვენა, როგორ გადაჰყავდათ დაჭრილები საკაცეებით საავადმყოფოში.
ჰუსიტების მიერ მართულმა საინფორმაციო სააგენტო „საბამ“ განაცხადა, რომ თავდასხმა საუდის არაბეთმა განახორციელა.
საუდის არაბეთი უკვე ათ წელზე მეტია, ხელმძღვანელობს კოალიციას, რომელიც იემენის საერთაშორისოდ აღიარებულ მთავრობას ჰუსიტების წინააღმდეგ ეხმარება.
იემენში ომი რამდენიმე წლის განმავლობაში მიჩუმებული იყო, თუმცა ირანის ომის შედეგად კვლავ გააქტიურდა.
ზავი დაირღვა მას შემდეგ, რაც საუდის არაბეთმა დაარტყა სანას აეროპორტს — რომელიც ჰუსიტების კონტროლქვეშაა — რათა ირანული თვითმფრინავის დაშვება აეცილებინა.
ამის შემდეგ, თეირანის მხარდაჭერით მოქმედმა ჰუსიტებმა სამიზნედ აირჩიეს აბჰას აეროპორტი საუდის არაბეთში, შემდეგ კი დაიწყეს საუდის გემებზე თავდასხმები წითელ ზღვაში, იემენის სანაპიროსთან, სადაც საუდის არაბეთი ჰორმუზის სრუტის ალტერნატიულ ნავთობის საექსპორტო მარშრუტს იყენებს.
ამის შემდეგ იემენში განახლდა მასშტაბური ბრძოლები ჰუსიტებსა და საუდის არაბეთის მხარდაჭერით მოქმედი მთავრობის ძალებს შორის.
პარასკევს, თავდასხმამ ტაიზის პროვინციაში, რომელიც ბოლო დროს ბრძოლის ეპიცენტრია, 30 ადამიანის სიცოცხლე იმსხვერპლა.
ჰუსიტებმა თავდასხმაში საუდის არაბეთი დაადანაშაულეს, ხოლო მთავრობის ძალებმა ჰუსიტები დაადანაშაულეს იმაში, რომ მათ ბაზარზე რაკეტა გაუშვეს.
გაეროს ინფორმაციით, ბრძოლების განახლების შემდეგ 1 600-ზე მეტი ადამიანი დაიღუპა და 300 000-ზე მეტი იძულებით გადაადგილდა.
საუდის არაბეთი რეგულარულად ბომბავს ჰუსიტების პოზიციებს, ხოლო ჰუსიტები მრავალჯერ ესროდნენ რაკეტებს საუდის არაბეთის ტერიტორიაზე, მათ შორის აეროპორტებსა და ნავთობის ობიექტებს.
რამდენიმე საათით ადრე, ვიდრე ავიადარტყმა ალ-შარიაში განხორციელდებოდა, საუდის არაბეთის ხელმძღვანელობით მოქმედმა კოალიციამ განაცხადა, რომ რიადისკენ მიმავალი რაკეტა გაანეიტრალა.
ჰუსიტების ლიდერმა მაჰდი ალ-მაშატმა პირობა დადო, რომ ჯგუფი იემენში ბოლო თავდასხმებზე შურს იძიებს.
