ირანთან ომის დაწყების შემდეგ შეერთებულ შტატებს მნიშვნელოვნად შეუმცირდა წლების განმავლობაში დაგროვილი კრიტიკული საბრძოლო მასალის მარაგი. საუბარია, მათ შორის, შორ მანძილზე მოქმედ Tomahawk-ის ფრთოსან რაკეტებზე, რის შესახებაც Financial Times წყაროებზე დაყრდნობით წერს.

გამოცემის ერთ-ერთმა წყარომ აღნიშნა, რომ ამ მასშტაბის ხარჯების შედეგებს ამერიკის სამხედრო-საზღვაო ფლოტი მომდევნო რამდენიმე წლის განმავლობაშიც იგრძნობს.

პენტაგონი, სავარაუდოდ, უახლოეს დღეებში თეთრ სახლსა და კონგრესს დამატებით სამხედრო დაფინანსებას სთხოვს, რომლის მოცულობამ შესაძლოა 50 მილიარდ დოლარს მიაღწიოს.

ამავე დროს, კვირის დასაწყისში პენტაგონის წარმომადგენლებმა სენატორებს აცნობეს, რომ ომის პირველი ექვსი დღის განმავლობაში აშშ-ს სამხედრო ოპერაციები უკვე 11 მილიარდ დოლარზე მეტი დაუჯდა. ამ ხარჯების დიდი ნაწილი საბრძოლო მასალაზე მოდის. Financial Times-ის ინფორმაციით, პენტაგონი კონგრესს მალე მიაწვდის დეტალურ ანგარიშს დახარჯული საბრძოლო რესურსების შესახებ.

სტრატეგიული და საერთაშორისო კვლევების ცენტრის მონაცემებით, ომის პირველ 100 საათში აშშ-მ 168 Tomahawk-ის ტიპის ფრთოსანი რაკეტა გამოიყენა. ერთ-ერთმა ამერიკელმა კანონმდებელმა გამოცემასთან აღნიშნა, რომ ეს ძალიან დიდი რაოდენობაა და ასეთი მარაგის სრულად აღდგენას წლები დასჭირდება. ერთი Tomahawk-ის რაკეტის ფასი დაახლოებით 3.6 მილიონ დოლარს შეადგენს.

შეერთებული შტატები და ისრაელი ირანის წინააღმდეგ სამხედრო ოპერაციებს 28 თებერვლიდან ახორციელებენ. საპასუხოდ ირანი დარტყმებს აყენებს როგორც ისრაელის ტერიტორიაზე, ასევე სპარსეთის ყურეში განთავსებულ ამერიკულ სამხედრო ბაზებზე.