ვაშინგტონის ნაციონალურ მოლზე ორშაბათს დონალდ ტრამპის დამცინავი ახალი ქანდაკება დადგეს. ამჯერად, ქანდაკება აშშ-ის პრეზიდენტის ე.წ. „ძვლის წანაზარდებს“ დასცინის, რომლის დიაგნოზიც ტრამპს დაუსვეს და რის გამოც ვიეტნამის ომის გაწვევას თავი აარიდა.
ვეტერანთა დღის დაწყებამდე ორი დღით ადრე, მოოქროვილი ქანდაკება სახელწოდებით „ფეხის ჯარისკაცი“ (The Foot Soldier) გამოჩნდა ეროვნული გალერეის სკულპტურის ბაღის მახლობლად. ქანდაკება შექმნა ანონიმური ხელოვანთა ჯგუფმა Secret Handshake-მა და მასზე ტრამპი გამოსახულია მჯდომარე მდგომარეობაში, შიშველი ფეხის სრესით.
„ჩვენ პატივს ვცემთ ჩვენს მთავარსარდალს, დონალდ ჯ. ტრამპს, მის სამსახურსა და მსხვერპლს. ის სულით ჯარისკაცია, რომელმაც გაწვევას თავი აარიდა და ამისთვის იდეალური დიაგნოზი – ძვლის წანაზარდები – გამოიყენა“, – წერია ქანდაკების დაფაზე.
ხელოვნების ეს ნამუშევარი მიუთითებს ბრალდებებზე, რომ ტრამპმა 1968 წელს ვიეტნამის ომის გაწვევას თავი აარიდა მას შემდეგ, რაც კოლეჯი დაამთავრა და ქუსლებში ძვლის წანაზარდების დიაგნოზი მიიღო.
„ჩვენ ვესალმებით ლიდერს, რომელმაც იცის, რომ მსხვერპლში ‘მე’ ყოველთვის არის, და მებრძოლს, რომელიც გვახსენებს, რომ ზოგჯერ, როცა ფეხზე დადგომას გთხოვენ, უმჯობესია უბრალოდ დაჯდე და ფეხები დაისვენო“, – წერია დაფაზე.
„ტოი“ (Toey) – ექვსფუტიანი მასკოტი, რომელიც ძვლის წანაზარდებით შეწუხებულ თითს განასახიერებს – ქანდაკების გვერდით იდგა და ინტერაქტიულ ელემენტს წარმოადგენდა, – ნათქვამია Secret Handshake-ის განცხადებაში.
„გაწვევას თავი აარიდა? მე ძლივს ვიცნობ მას“, – უთხრა ვაშინგტონ პოსტს ტოის ფორმაში გამოწყობილმა პირმა. „მე ყველაზე დიდი თითი ვარ. უზარმაზარი. ყველაზე დიდი თითი, რაც კი ვინმეს უნახავს.“
ტრამპს გაწვევის თავიდან არიდების ბრალდებები ჯერ კიდევ პირველი ვადიდან მოჰყვება. 2018 წელს New York Times-მა გამოაქვეყნა სტატია, სადაც ბრონქსის ერთ ექიმს ტრამპის მამისთვის „მომსახურების გაწევაში“ ადანაშაულებდნენ – თითქოს მან ტრამპს ძვლის წანაზარდების დიაგნოზი განგებ დაუსვა. 2019 წელს ტრამპის ყოფილმა ადვოკატმა მაიკლ კოენმა კონგრესში განაცხადა, რომ პრეზიდენტმა შეგნებულად აირიდა გაწვევა.
თეთრი სახლის წარმომადგენელმა დევიდ ინგლმა განაცხადა: „ტრამპის სინდრომი ავადმყოფობაა, რომელიც დემოკრატი აქტივისტების ტვინს ანადგურებს. პრეზიდენტი ტრამპი არასოდეს დაიხევს უკან ამერიკელი ხალხის დასაცავად და მათთვის ბრძოლისას.“
Secret Handshake-მა ასევე დადგა ქანდაკებები, რომლებიც ტრამპის ურთიერთობას ჯეფრი ეპსტეინთან და ლინკოლნის საპირფარეშოს რემონტს დასცინის მთავრობის დახურვის პერიოდში.
გასულ წელს ანონიმურმა ხელოვანებმა შექმნეს ქანდაკება „საუკეთესო მეგობრები სამუდამოდ“ (Best Friends Forever), სადაც ტრამპი ეპსტეინს ხელს უჭერდა. მარტში Secret Handshake-მა დადგა ქანდაკება „მსოფლიოს მეფე“ (King of the World), სადაც ტრამპი ეპსტეინს ტიტანიკის ცნობილი პოზით იჭერდა.
Secret Handshake-ის განცხადებით, „ფეხის ჯარისკაცი“ და „ტოი“ ვეტერანთა დღემდე დარჩებიან ნაციონალურ მოლზე.
