იტალიის მასშტაბით სკოლებმა მეორე დღეა, ბომბის საფრთხის შესახებ შეტყობინებები მიიღეს, რამაც ახალი პანიკა და ევაკუაციები გამოიწვია.
დაახლოებით 1 800 სკოლამ — მილანიდან ჩრდილოეთში სიჩილიამდე სამხრეთში — მიიღო მსგავსი მუქარა, როგორიც ოთხშაბათს იტალიაში ქაოსს გამოიწვია, მიუხედავად იმისა, რომ არც ერთ ადგილზე ასაფეთქებელი მოწყობილობა არ აღმოჩნდა.
იტალიის მთავრობამ სკოლებს ურჩია, რომ „მასობრივი ელფოსტის მიღების გარდა, კონკრეტული მტკიცებულების არარსებობის შემთხვევაში, შენობები არ უნდა ევაკუირდეს“.
ოთხშაბათს ბომბის მუქარა მიიღეს ასევე შოტლანდიისა და ჩრდილოეთ ირლანდიის სკოლებმა. უცნობია, დაკავშირებულია თუ არა ეს შემთხვევები ერთმანეთთან.
ხუთშაბათის დილით, ბომბის განგაში კალეს რკინიგზის სადგურზე, ჩრდილოეთ საფრანგეთში, საერთაშორისო და ეროვნული მატარებლების მოძრაობას შეფერხება მოუტანა.
ბოლო შემთხვევები მოჰყვა გასულ კვირას ევროპული ქვეყნების აეროპორტებსა და ავიაკომპანიებზე განხორციელებულ ბომბის ცრუ მუქარებს.
მუქარების ნაწილი ექსტრემისტულ, მისოგინიურ ჯგუფს მიეწერა, თუმცა მოგვიანებით ამ ჯგუფმა კავშირი ცრუ გაფრთხილებებთან უარყო.
ოთხშაბათს გაგზავნილი ელფოსტა — რომელიც იტალიის 7 476 სახელმწიფო სკოლიდან 6 300-ს გაეგზავნა — თითქოსდა „მიხაილ ანდროპოვისგან, ვილაიათ დი მისოგინისტანის ლიდერისგან“ იყო.
ზოგიერთი ოფიციალური პირი ამბობს, რომ შეტყობინება ტაივანიდან იყო გაგზავნილი.
ხუთშაბათს იტალიურ სკოლებში გაგზავნილი მსგავსი შეტყობინება, კვლავ მიხაილ ანდროპოვის ხელმოწერით, სავარაუდოდ ფილიპინებში მცხოვრები მასწავლებლის გატეხილი ანგარიშიდან გაიგზავნა.
პრემიერ-მინისტრი ჯორჯია მელონი აცხადებს, რომ „ეს არის სტრატეგია, რომელიც მიზნად ისახავს შეშფოთებისა და შფოთვის გამოწვევას“.
ბევრი მშობელი მაინც შეშფოთებულია და მთავრობისგან გამჭვირვალობასა და ქმედებებს ითხოვს.
გაზეთი La Repubblica წერს, რომ პროტესტი გაიმართა რომის ერთ-ერთი საშუალო სკოლის დირექტორის გადაწყვეტილების წინააღმდეგ, რომელმაც არანაირი ზომა არ მიიღო, რადგან მიიჩნია, რომ მუქარის შემცველი შეტყობინება შეცდომებით იყო დაწერილი და შესაბამისად „ცრუ“ იყო.
გაზეთის ინფორმაციით, პროტესტის მონაწილეები ახალი ეროვნული რეკომენდაციების გამოცემას ითხოვენ.
