
სამხრეთ კორეის უზენაესმა სასამართლომ ხუთშაბათს გააუქმა ქვეყნის ყოფილი პრემიერ-მინისტრის, ჰან დოკ-სუსთვის 15-წლიანი პატიმრობის განაჩენი, რომელიც მას ყოფილი პრეზიდენტის, იუნ სოკ-იოლის მიერ 2024 წელს საომარი მდგომარეობის შემოღებაში მნიშვნელოვანი როლის შესრულებისთვის ჰქონდა მისჯილი.
საქმე ახლა დაბრუნდება ქვედა ინსტანციის სასამართლოში — სეულის სააპელაციო სასამართლოში, რომელმაც ჰანს მაისში 15-წლიანი პატიმრობა მიუსაჯა.
რატომ გაუუქმა სასამართლომ ყოფილი პრემიერის განაჩენი?
ჰანი დამნაშავედ ცნეს აჯანყების დაგეგმვაში დახმარებისთვის — კერძოდ, მან იუნს ურჩია, კაბინეტის სხდომა ჩაეტარებინა, რათა საომარი მდგომარეობა ლეგიტიმურად წარმოჩენილიყო.
ასევე, მას ბრალად ედება, რომ ცდილობდა კაბინეტის წევრების ხელმოწერების შეგროვებას შესაბამის დოკუმენტზე და განიხილავდა ბრძანებებს, რომლებიც კრიტიკული მედია საშუალებებისთვის ელექტროენერგიისა და წყლის მიწოდების შეწყვეტას ითვალისწინებდა.
უზენაესმა სასამართლომ ხუთშაბათს დაადგინა, რომ პროკურორებმა საკმარისად ვერ დაამტკიცეს ბრალდება და განაჩენის გადახედვა დაავალა.
ამავდროულად, უმაღლესმა სასამართლომ ძალაში დატოვა ოთხწლიანი პატიმრობა იუნის მეუღლისთვის, კიმ კონ ჰისთვის, რომელსაც კორუფციაში, მათ შორის, აქციების ფასების მანიპულირებასა და ქრთამის აღებაში ედებოდა ბრალი.
რა იყო 2024 წლის აჯანყება?
2024 წლის 3 დეკემბერს, ყოფილმა პრეზიდენტმა იუნ სოკ-იოლმა მოულოდნელად გამოაცხადა საომარი მდგომარეობა, რამაც მასობრივი პროტესტები და პარლამენტში დაპირისპირება გამოიწვია.
იმ დროს იუნი აცხადებდა, რომ ეს ნაბიჯი აუცილებელი იყო ქვეყნის „ჩრდილოეთ კორეის მომხრე ძალებისგან“ გასათავისუფლებლად და ამის შემდეგ ჯარი და პოლიცია პარლამენტში შეიყვანა.
თუმცა, საკმარისი რაოდენობის დეპუტატებმა მოახერხეს ასამბლეის დარბაზში შესვლა და ერთხმად ჩააგდეს იუნის დეკრეტი, რის შედეგადაც მის კაბინეტს მისი გაუქმება მოუწია.
იუნი იმპიჩმენტით გადააყენეს და მოგვიანებით დამნაშავედ ცნეს აჯანყების ხელმძღვანელობაში, რის გამოც მას სამუდამო პატიმრობა მიესაჯა.


















