გემი, რომელიც ოდესღაც მსოფლიოში ყველაზე სწრაფი იყო და ტიტანიკზე გრძელია, ფლორიდის სანაპიროსთან განზრახ ჩაძირეს და ის მსოფლიოში უდიდეს ხელოვნურ ოკეანურ რიფად იქცა.
SS United States თითქმის 30 წელი ფილადელფიაში იყო გაჩერებული, სანამ ფლორიდაში გადაიყვანეს, სადაც ის ზღვის ცხოველებისთვის სახლად და წყალქვეშა მოყვარულებისთვის ატრაქციონად იქცევა.
აქტივისტებმა უშედეგოდ იბრძოლეს ისტორიული ლაინერისთვის, რომელმაც ასობითჯერ გადაკვეთა ატლანტის ოკეანე, რომ მუზეუმად შემონახულიყო.
ამის ნაცვლად, მას შემდეგ რაც ფლორიდის ერთ-ერთმა ოლქმა შეიძინა, გემი სანაპიროსთან არსებულ ათეულობით ხელოვნურ რიფს დაემატა, ხოლო გემის ისტორიის ამსახველი ხმელეთზე განთავსებული მუზეუმის გახსნაც იგეგმება.
გემის პენსიამდე, SS United States ცნობილია იყო იმით, რომ მასზე სამეფო ოჯახის წევრები და ცნობილი ადამიანები მოგზაურობდნენ აშშ-სა და ევროპას შორის, 1952 წლიდან 1969 წლამდე.
ახალგაზრდა ბილ კლინტონმა, სანამ პრეზიდენტი გახდებოდა, სწორედ ამ გემით გადაკვეთა ატლანტიკა. ასევე, ყოფილი პრეზიდენტები ჰარი ტრუმენი, დუაიტ აიზენჰაუერი და ჯონ კენედიც მოგზაურობდნენ ამ ხომალდით.
გემი ფილადელფიიდან ალაბამაში გადაიყვანეს გასულ წელს, სადაც მისი გაწმენდა და აღდგენა ჩატარდა.
ორშაბათს, მან ბოლო მოგზაურობა ალაბამადან ფლორიდის დესტინის სანაპირომდე განახორციელა, სადაც ოთხშაბათს სპეციალური ოპერაციით, ასაფეთქებელი ნივთიერებების გარეშე ჩაძირეს.
ვარსკვლავები, მათ შორის მარლონ ბრანდო, კოკო შანელი, დიუკ ელინგტონი, სალვადორ დალი, უოლტ დისნეი, ჯუდი გარლენდი და კერი გრანტი, ასევე იმყოფებოდნენ გემზე მისი მოქმედების პერიოდში.
მანამდე, სანამ ფლორიდის მუნიციპალური მთავრობა შეიძენდა გემს, რამდენიმე წინადადება არსებობდა, რომ SS United States მუზეუმად ან მცურავ სასტუმროდ გადაექციათ, თუმცა ყველა ეს გეგმა ჩავარდა.
ამის ნაცვლად, გემი სხვადასხვა პორტში სხვადასხვა მფლობელთან იდგა, სანამ სასამართლო დავები მიმდინარეობდა.
SS United States Conservancy-ის ჯგუფი არაერთხელ ცდილობდა გემის წყლის ზედაპირზე შენარჩუნებას, თუმცა უშედეგოდ.
კონსერვაციის ჯგუფის პრეზიდენტმა, სუზან გიბსმა, რომლის პაპაც გემის დიზაინზე მუშაობდა, განაცხადა, რომ უხარია, SS United States-ის ისტორია გაგრძელდება.
„[ეს გემი] ყოველთვის იყო ამაყად ამერიკული სიმბოლო, რომელიც უამრავ ადამიანს აერთიანებს,“ – განუცხადა გიბსმა CBS News-ს, BBC-ის ამერიკელ პარტნიორს.
