დიპლომატიური ტრადიციის მიხედვით, დამოუკიდებლობის დღეებს ჩვეულებრივ ულოცავენ ქვეყნის პირველ ოფიციალურ პირს. საპარლამენტო რესპუბლიკის შემთხვევაში ასეთია პრემიერ-მინისტრი.
სწორედ ამ პრინციპს მიჰყვა დონალდ ტრამპი 2020 წელს, როცა აშშ-ის პრეზიდენტის სტატუსით მიწერა წერილი მაშინდელ პრემიერ-მინისტრს გიორგი გახარიას. ამ წერილში ნათლად ჩანს, რომ მილოცვა არის საქართველოს სახელმწიფოს და ქართველი ხალხის მიმართ, და არა რომელიმე კონკრეტული პოლიტიკური ჯგუფის მისამართით:
აი როგორი იყო პრეზიდენტ ტრამპის მიერ გამოგზვანილი წერილი 2020 წელს:
„ძვირფასო პრემიერ-მინისტრო!
ამერიკელი ხალხის სახელით, გულწრფელად მოგესალმებით და გილოცავთ დამოუკიდებლობის დღეს — 26 მაისს!
ათწლეულების განმავლობაში ამერიკის შეერთებულ შტატებს და საქართველოს აკავშირებთ მტკიცე პარტნიორობა, რომელიც ეფუძნება საერთო ღირებულებებს და ინტერესებს. ამერიკის შეერთებული შტატები დიდად აფასებს და პატივისცემით ეპყრობა საქართველოს თავდაცვისუნარიანობის გაძლიერებისკენ მიმართულ ძალისხმევას, მათ შორის მნიშვნელოვან წვლილს ნატოს მისიაში ავღანეთში, სადაც ქართველი მებრძოლები ამერიკული და ნატოს ძალების მხარდამხარ მსახურობენ. ჩვენ მტკიცე მხარდაჭერას ვუცხადებთ საქართველოს სუვერენიტეტს და ტერიტორიულ მთლიანობას საერთაშორისოდ აღიარებულ საზღვრებში. ჩვენ გავაგრძელებთ საქართველოს ურყევ მხარდაჭერას ნატოსკენ მიმავალ გზაზე. ჩვენი პარტნიორობა გრძელდება, დღეს ჩვენ ვთანამშრომლობთ კორონავირუსის უპრეცედენტო გლობალურ პანდემიასთან ბრძოლაში.
ჩვენ მტკიცედ ვუჭერთ მხარს საქართველოს დემოკრატიულ და ეკონომიკურ განვითარებას, რაც არსებითად მნიშვნელოვანია ევროატლანტიკურ ინტეგრაციასთან დაკავშირებით ქართველი ხალხის მისწრაფებების განსახორციელებლად. ველი თქვენთან თანამშრომლობას, რათა დავეხმაროთ საქართველოს დემოკრატიული ინსტიტუტების კონსოლიდაციასა და პოლიტიკური პლურალიზმის განმტკიცებაში, კანონის უზენაესობის გაძლიერებაში, რომლის საყრდენს წარმოადგენს დამოუკიდებელი სასამართლო, ასევე — ეკონომიკის დივერსიფიკაციაში.
გულითადად ვულოცავ ქართველებს, ვუსურვებ კეთილდღეობას, ნაყოფიერ და უსაფრთხო მომავალს“, — ციტირებდა მაშინ აშშ-ის პრეზიდენტის წერილს მთავრობის პრეს-სამსახური.
27 მაისს საქართველოში მიხეილ ყაველაშვილის ადმინისტრაციის მიერ გავრცელდა წერილი, რომლითაც პრეზიდენტმა ტრამპმა საქართველოს დამოუკიდებლობის დღე 26 მაისი მიხეილ ყაველაშვილს მიულოცა.
