OpenAI საჯარო ბაზარზე გასვლას, შესაძლოა, მომდევნო წლამდე არ იჩქარებდეს. ამის შესახებ Reuters-ი The New York Times-ზე დაყრდნობით წერს. გამოცემის ინფორმაციით, გადაწყვეტილების განხილვაში ჩართული სამი პირი ამბობს, რომ კომპანია IPO-ს დროის გადახედვას განიხილავს.
OpenAI-მ აშშ-ში პირველადი საჯარო შეთავაზებისთვის, იგივე IPO-სთვის, კონფიდენციალური განაცხადი უკვე შეიტანა. Reuters-ის ცნობით, ხელოვნური ინტელექტის კომპანია მიზნად 1 ტრილიონ დოლარამდე შეფასებას ისახავს. გამოცემის ინფორმაციით, OpenAI-ის ფინანსურმა დირექტორმა სარა ფრაიარმა ახლო წრეში აღნიშნა, რომ კომპანია 2027 წელს საჯარო ბაზარზე გასვლაზეა ორიენტირებული.
The New York Times-ის ცნობით, OpenAI-ის მრჩევლებმა კომპანიის ხელმძღვანელობას ორი ვარიანტი წარუდგინეს: დაელოდონ 2027 წელს და საჯარო ბაზარზე 1 ტრილიონი დოლარის შეფასებით გავიდნენ, ან უფრო სწრაფი IPO-სთვის სამიზნე შეფასება შეამცირონ. გამოცემის მიხედვით, OpenAI-ის აღმასრულებელმა დირექტორმა სემ ალტმანმა შეფასების შემცირება მიუღებელ ვარიანტად მიიჩნია.
IPO-სთან დაკავშირებული დისკუსიების პარალელურად, Reuters-ი წერს, რომ აშშ-ის პრეზიდენტ დონალდ ტრამპის ადმინისტრაციამ OpenAI-ს ახალი მოდელის ეტაპობრივად გამოშვება სთხოვა. მიზეზად უსაფრთხოებასთან დაკავშირებული რისკები სახელდება.
The Information-ის ინფორმაციით, სემ ალტმანმა თანამშრომლებს განუცხადა, რომ კომპანია ახალ მოდელს, GPT 5.6-ს, თავდაპირველად შეზღუდულ რეჟიმში, შერჩეულ პარტნიორებთან გამოუშვებს. ამავე ცნობით, საცდელი პერიოდის განმავლობაში მთავრობის მხრიდან წვდომა მომხმარებლების მიხედვით, ინდივიდუალურად დამტკიცდება.
Reuters-ის ცნობით, მოდელის ეტაპობრივად გამოშვების მოთხოვნა აშშ-ის ეროვნული კიბერდირექტორის ოფისისა და მეცნიერებისა და ტექნოლოგიების პოლიტიკის ოფისისგან წამოვიდა.
OpenAI-ის შესაძლო IPO ტექნოლოგიურ ბაზარზე ერთ-ერთ ყველაზე მნიშვნელოვან მოვლენად განიხილება. კომპანია ChatGPT-ის შემქმნელია და ხელოვნური ინტელექტის სექტორში ინვესტორების განსაკუთრებული ინტერესის ფონზე საჯარო ბაზარზე გასვლა მისთვის კაპიტალის მოზიდვის კიდევ ერთი მნიშვნელოვანი გზა შეიძლება გახდეს. თუმცა, როგორც ბოლო ცნობები აჩვენებს, კომპანიისთვის მთავარი გამოწვევა დროის შერჩევა და 1 ტრილიონ დოლარამდე შეფასების შენარჩუნებაა.
