საფრანგეთის სამხედრო-საზღვაო ძალებმა კიდევ ერთი ტანკერი დააკავეს, რომელიც, პარიზის განცხადებით, რუსეთის „ჩრდილოვან ფლოტთან“ არის დაკავშირებული. Reuters-ის ინფორმაციით, ეს ნაბიჯი აჩვენებს, რომ ევროპა წელს კიდევ უფრო აძლიერებს ძალისხმევას რუსეთის წინააღმდეგ დაწესებული სანქციების აღსასრულებლად და მოსკოვის ერთ-ერთი მთავარი შემოსავლის წყაროს შესაზღუდად.

2026 წლის დასაწყისიდან ევროპაში უკვე დაკავებულია რუსეთის „ჩრდილოვან ფლოტთან“ დაკავშირებული 9 საეჭვო ტანკერი, მათ შორის 4 საფრანგეთმა დააკავა. 14 ივნისს ბრიტანეთმა ნავთობტანკერი ლა-მანშის სრუტეში დააკავა. კიდევ 3 საეჭვო ტანკერი ხმელთაშუა ზღვაში ევროპული საზღვაო მისიის ფარგლებში შეამოწმეს.ტანკერის დაკავება ნიშნავს, რომ ქვეყნის სამხედრო-საზღვაო ძალებმა ან სანაპირო დაცვამ გემი გააჩერეს, გადაადგილება შეუზღუდეს და კონტროლის ქვეშ აიყვანეს.

ამ კონკრეტულ შემთხვევაში, საფრანგეთმა ტანკერი შეაჩერა და დააკავა, რადგან ეჭვობენ, რომ ის რუსეთის „ჩრდილოვან ფლოტს“ ეკუთვნის ან მასთან არის დაკავშირებული. ანუ, შესაძლოა, გემი რუსულ ნავთობს სანქციების გვერდის ავლით ატარებდა.

საფრანგეთის პრეზიდენტმა ემანუელ მაკრონმა ტანკერ Deliver-ის დაკავების შემდეგ განაცხადა, რომ ევროპა არ დაუშვებს „ჩრდილოვანმა ფლოტმა“ სანქციების გვერდის ავლით რუსეთის სამხედრო ძალისხმევა დააფინანსოს.

„ჩვენ არ მივცემთ ჩრდილოვან ფლოტს საშუალებას, გვერდი აუაროს სანქციებს და დააფინანსოს რუსეთის ომი. ევროპა მტკიცედ არის განწყობილი“, - დაწერა მაკრონმა სოციალურ ქსელში.

ტანკერი რუსეთის ერთ-ერთი მთავარი ნავთობის საექსპორტო ტერმინალიდან, პრიმორსკიდან გამოვიდა. ის სიცილიის სიახლოვეს შეაჩერეს, როდესაც სუეცის არხისკენ, შემდეგ კი სინგაპურის მიმართულებით გადაადგილდებოდა.

რუსეთის საელჩომ საფრანგეთში ტანკერის დაკავებას „მეკობრეობის კიდევ ერთი შემთხვევა“ უწოდა და განაცხადა, რომ ეს ქმედება საერთაშორისო სამართლის თვალსაზრისით „უკანონო და მიუღებელია“. ამის შესახებ რუსული სახელმწიფო სააგენტო TASS წერს. საელჩოს წინასწარი ინფორმაციით, ეკიპაჟის წევრებს შორის რუსეთის მოქალაქეები არ არიან.

ევროკავშირის ქვეყნები ამჟამად რუსეთის წინააღმდეგ სანქციების 21-ე პაკეტზე მუშაობენ. თუმცა მოსკოვმა უკვე მოახერხა ბევრ შეზღუდვასთან ადაპტაცია და კვლავ ყიდის მილიონობით ბარელ ნავთობს ისეთ ქვეყნებში, როგორებიც არიან ინდოეთი და ჩინეთი.

ამ ექსპორტის მნიშვნელოვანი ნაწილი სწორედ ე.წ. ჩრდილოვანი ფლოტის მეშვეობით ხორციელდება. ეს არის გემების ქსელი, რომელიც დასავლური საზღვაო ინდუსტრიის გარეთ მოქმედებს და სანქციების გვერდის ავლით ნავთობისა და გაზის გადაზიდვას ემსახურება.

დასავლური სამხედრო წყაროს ინფორმაციით, Deliver კამერუნის დროშით გადაადგილდებოდა, თუმცა რამდენიმე კვირით ადრე ის ოფიციალურად ამოიღეს კამერუნის რეესტრიდან. ამის გამო, გემი ფაქტობრივად ეროვნების გარეშე მოძრაობდა, რაც საერთაშორისო საზღვაო სამართლის დარღვევად ითვლება. სწორედ ამან მისცა საფრანგეთს მისი გაჩერებისა და დაკავების საფუძველი.

კამერუნის ხელისუფლება უკვე აფრთხილებდა საერთაშორისო საზოგადოებას, რომ ქვეყნის დროშას სულ უფრო ხშირად იყენებენ სანქცირებული გემები და რუსეთის „ჩრდილოვან ფლოტთან“ დაკავშირებული ტანკერები. მსგავსი გემები, როგორც წესი, მოძველებულია და გაუმჭვირვალე მფლობელობის სტრუქტურებით მოქმედებს, რაც ზედამხედველობისგან თავის არიდებას აადვილებს.

წლის დასაწყისიდან ევროპულმა ქვეყნებმა დაკავებები და შემოწმებები გააძლიერეს მნიშვნელოვან საზღვაო მარშრუტებზე, მათ შორის ბალტიის ზღვაში, ლა-მანშის სრუტესა და ხმელთაშუა ზღვაში. ეს მიმართულებები განსაკუთრებით მნიშვნელოვანია რუსეთის ნავთობის აზიურ ბაზრებზე გასატანად.