აშშ-ის პრეზიდენტ დონალდ ტრამპის ადმინისტრაციამ კონგრესს ოფიციალურად აცნობა, რომ თურქეთისთვის 700 მილიონ დოლარზე მეტი ღირებულების რეაქტიული ავიაძრავების მიყიდვას გეგმავს. ამის შესახებ Reuters-ი ორ წყაროსა და ოფიციალურ შეტყობინებაზე დაყრდნობით წერს.

Reuters-მა მანამდე გაავრცელა ინფორმაცია, რომ ტრამპის ადმინისტრაცია აპირებდა გარიგების გაგრძელებას, მიუხედავად იმისა, რომ მას კონგრესის ზოგიერთი წევრი ეწინააღმდეგებოდა. მათი კრიტიკა უკავშირდება თურქეთის მიერ რუსული თავდაცვის სისტემების შენარჩუნებას, რომლებიც ანკარამ 2019 წელს შეიძინა.

ავიაძრავები თურქეთის პირველი ეროვნული საბრძოლო თვითმფრინავის, KAAN-ისთვის არის განკუთვნილი. Reuters-ის ცნობით, მათი მწარმოებელი General Electric-ია, ხოლო პაკეტის ღირებულება 700 მილიონ დოლარს აღემატება.

ეს ნაბიჯი ვაშინგტონის მხრიდან ანკარის მიმართ მნიშვნელოვან პოლიტიკურ ჟესტად განიხილება, განსაკუთრებით იმ ფონზე, როდესაც მომდევნო თვეში თურქეთში NATO-ს მნიშვნელოვანი სამიტი უნდა გაიმართოს. Reuters-ის შეფასებით, გადაწყვეტილება ასევე მიმართულია თურქეთის პრეზიდენტ რეჯეფ თაიფ ერდოღანისკენ, რომელსაც ტრამპი მნიშვნელოვან მოკავშირედ მიიჩნევს.

აშშ-სა და თურქეთს შორის თავდაცვის სფეროში ურთიერთობები წლების განმავლობაში დაძაბულია. მთავარი უთანხმოება თურქეთის მიერ რუსული S-400 ტიპის საჰაერო თავდაცვის სისტემების შეძენას უკავშირდება. ამ გადაწყვეტილების შემდეგ ვაშინგტონმა ანკარა F-35-ის პროგრამიდან ჩამოაშორა და სანქციებიც დაუწესა.

აშშ-ის მხარე მიიჩნევს, რომ S-400-ის სისტემები NATO-ს ტექნოლოგიებისთვის უსაფრთხოების რისკს ქმნის. მიუხედავად ამისა, ტრამპის ადმინისტრაცია თურქეთთან თავდაცვის სფეროში თანამშრომლობის გარკვეული ფორმით აღდგენას ცდილობს.

Reuters-ის ცნობით, აშშ-ის სახელმწიფო დეპარტამენტს საკითხზე კომენტარი დაუყოვნებლივ არ გაუკეთებია.