არგენტინაში შინაპატიმრობაში მყოფი 74 წლის იტალიელი, რომელიც 1970-იან წლებში მემარცხენე რადიკალური დაჯგუფების მიერ განხორციელებულ გატაცებაში იყო დამნაშავედ ცნობილი, გაიქცა და ამჟამად მიმალვაში იმყოფება.

ლეონარდო ბერტულაციმ ბუენოს-აირესის ცენტრში, მეხუთე სართულის აივნიდან სპეციალური აღჭურვილობის დახმარებით ჩამოეშვა.

მისი გაქცევა მაშინვე არ დაფიქსირებულა, რადგან მან ელექტრონული სამაჯური ისე დაამუშავა, რომ მოწყობილობა სხეულის ტემპერატურის მონაცემებს აგრძელებდა გადაცემას, მიუხედავად იმისა, რომ ბერტულაციმ იგი გახსნა და მიიმალა.

ბერტულაციმ უკვე ათწლეულები გაატარა გაქცეულად, მას შემდეგ რაც იტალიაში დაუსწრებლად მიუსაჯეს სასჯელი 1977 წელს იტალიელი საზღვაო ინჟინრის, პიეტრო კოსტას გატაცებისთვის.

ის იტალიაში ექსტრადიციის მოლოდინში იმყოფებოდა და არგენტინის უსაფრთხოების სამინისტრო მას ელექტრონული სამაჯურით აკონტროლებდა, რომელიც ტემპერატურასა და მოძრაობას აფიქსირებს.

ოფიციალური პირების თქმით, ეჭვი მაშინ გაუჩნდათ, როცა შენიშნეს, რომ სამაჯური ერთ ადგილზე იყო გაჩერებული.

როცა ბუენოს-აირესის ცენტრში, მეხუთე სართულის ბინაში შევიდნენ, ბერტულაცი იქ აღარ იყო, თუმცა სამაჯური ადგილზე დარჩა.

ბერტულაცის წარსულისა და „წითელი ბრიგადების“ მარქსისტული გერილიური ჯგუფის წევრობის, ასევე ბომბების დამზადების უნარების გამო, პოლიციამ, არგენტინულ გაზეთ Clarín-ის ცნობით, ადგილზე ასაფეთქებელი ნივთიერებების ექსპერტები გამოიძახა, რათა შეემოწმებინათ, ხომ არ იყო მოწყობილობა დანაღმული.

თუმცა, ექსპერტებმა დაადგინეს, რომ ბერტულაციმ მოწყობილობა მხოლოდ იმისთვის დაამუშავა, რომ მისი მოხსნისას განგაში არ ამოქმედებულიყო.

ამჟამად არგენტინაში მასშტაბური ძებნა მიმდინარეობს.

იტალიური მედიის ცნობით, მისი იტალიაში ექსტრადიცია გარდაუვალი იყო მას შემდეგ, რაც ბოლო საჩივარი უარყვეს.

ბერტულაცი პირველად 2002 წელს დააკავეს, როცა მეზობელი ჩილედან არგენტინაში ყალბი პასპორტით გადავიდა.

თუმცა, 2004 წელს მას ლტოლვილის სტატუსი მიანიჭეს და სამხრეთ ამერიკის ქვეყანაში თავისუფლად ცხოვრობდა 2024 წლამდე, როცა არგენტინის ამჟამინდელი მემარჯვენე პრეზიდენტი, ხავიერ მილეი, ხელისუფლებაში მოვიდა.

მილეის მთავრობამ მაშინ განაცხადა, რომ „ბერტულაცი პასუხისმგებელია დანაშაულებზე, რომლებმაც დააზიანა დემოკრატიული ღირებულებები და მრავალი მსხვერპლის სიცოცხლე“.

ის „წითელი ბრიგადების“ წევრი იყო — დაჯგუფებისა, რომელმაც 1970-80-იან წლებში არაერთი სახელმწიფო მოხელე გაიტაცა და მოკლა.

ბერტულაცი „წითელი ბრიგადების“ გენუის სექციის წევრი იყო, რომელმაც პიეტრო კოსტა ქუჩაში გაიტაცა და 81 დღის განმავლობაში ტყვეობაში ჰყავდა, სანამ გამოსასყიდის დიდ თანხას მიიღებდა.

გატაცებიდან მიღებული თანხით რომში ბინა შეიძინეს, რომელიც 1978 წელს „წითელი ბრიგადების“ ყველაზე გახმაურებული დანაშაულისთვის — იტალიის ყოფილი პრემიერ-მინისტრის, ალდო მოროს გატაცებისა და მკვლელობისთვის გამოიყენეს.

მორო მაშინ გაიტაცეს, როცა მისი ავტომობილი პარლამენტის გახსნაზე მიმავალ გზაზე ჩაუსაფრდნენ. ის ამ ბინაში 54 დღის განმავლობაში ჰყავდათ ტყვეობაში, შემდეგ კი მოკლეს და მისი ცხედარი რომის ცენტრში, Renault-ის საბარგულში დატოვეს.