
ათასობით მომხმარებელმა აშშ-ის წამყვან ბანკებში, მათ შორის ჯეი პი მორგან ჩეისში, უელს ფარგოსა და ბანკ ოფ ამერიკაში, სერვისებზე წვდომის პრობლემები დააფიქსირა.
ჩეის ბანკმა — რომელიც აშშ-ში უმსხვილესი საბანკო ინსტიტუტია — განაცხადა, რომ "პროგრამული უზრუნველყოფის ხარვეზმა" მის აპარატურულ სისტემებში შესაძლოა გამოიწვია ეს შეფერხება და აღნიშნა, რომ გავლენა სხვა ბანკებზეც შეიძლებოდა გავრცელებულიყო. ბანკის განმარტებით, პრობლემა იყო "დროებითი" და არ იყო "სისტემური" ან "კიბერ-შეტევასთან დაკავშირებული".
მომხმარებელთა უმრავლესობისთვის პრობლემები ორშაბათის საღამოსთვის უკვე შესუსტებული იყო.
ეს ინციდენტი მოჰყვა გასულ კვირას მომხდარ რამდენიმე დამოუკიდებელ ტექნიკურ შეფერხებას, მათ შორის მასშტაბურ Microsoft-ის გათიშვას, ასევე სატელეკომუნიკაციო პრობლემასა და ქსელის მარცხს, რამაც ყველა ამერიკული ავიარეისი დააყოვნა.
პრობლემები ორშაბათს დღის განმავლობაში დაიწყო. Downdetector-ის ვებგვერდის მიხედვით, თითქმის 5,000-მა მომხმარებელმა დააფიქსირა ჩეის ბანკის სერვისების გათიშვა.
ჩეის ბანკმა თავის მომხმარებლებს აცნობა, რომ "ზოგიერთი ტრანზაქცია ჩვეულებრივზე მეტ დროს საჭიროებს დასასრულებლად", თუმცა მათ მაინც "შეუძლიათ ანგარიშებსა და თანხებზე წვდომა".
ბანკი, რომელიც ჯეი პი მორგან ჩეისის შვილობილია, კომპანიის ვებგვერდის მიხედვით, ემსახურება 86 მილიონზე მეტ მომხმარებელს აშშ-ის მასშტაბით 5,000 ფილიალში, ასევე 7.4 მილიონ მცირე ბიზნესს. ის ასევე აშშ-ში წამყვანი საკრედიტო ბარათების გამცემია.
ხარვეზის ზუსტი ბუნება უცნობია. BBC-მ ჩეის ბანკს კომენტარისთვის მიმართა.
კიდევ ერთმა ინსტიტუტმა, US Bank-მა, განაცხადა, რომ მისი ზოგიერთი სისტემა უშუალოდ არ დაზარალებულა, თუმცა მომხმარებლებს, რომლებიც იყენებდნენ ციფრულ გადახდების პლატფორმა Zelle-ს, ერორ-მესიჯები მიუვიდათ, რომ გადახდების განხორციელება ვერ ხერხდებოდა.
Zelle-ს განცხადებით, მისი სერვისი "როგორც საჭიროა, ისე მუშაობს" და სხვა ბანკებში არსებული პრობლემები შეიძლება გადახდებზე აისახოს.
მომხმარებლებმა ასევე დააფიქსირეს პრობლემები Truist-ში, PNC-ში და Capital One-ში, თუმცა ყველა ამ კომპანიამ BBC-ს განუცხადა, რომ მათზე გავლენა არ ყოფილა.
ადგილობრივი დროით 18:00 საათისთვის (თბილისის დროით 23:00), ჩეისში, ბანკ ოფ ამერიკასა და US Bank-ში დაფიქსირებული გათიშვების რაოდენობა შემცირებული იყო.











