ტროტუარზე ქალის დაღუპვის საქმეზე მძღოლს 7 წლამდე პატიმრობა ემუქრება
უცხო ქვეყნის მოქალაქეს, რომელმაც 22 ივნისს თბილისში, დადიანის ქუჩაზე, ტროტუარზე მდგომ ქალს ავტომობილით შეეჯახა, ბრალი წარუდგინეს. მას 4-დან 7 წლამდე პატიმრობა ემუქრება.
პროკურატურის ინფორმაციით, შეჯახების შედეგად დაზარალებულმა სიცოცხლისთვის შეუთავსებელი მრავლობითი დაზიანებები მიიღო და კლინიკაში მიყვანისთანავე გარდაიცვალა.
დაკავებულის ადვოკატის, იმედა ქარქაშაძის თქმით, შემთხვევა ავტომობილის ტექნიკურმა გაუმართაობამ გამოიწვია. მისი განცხადებით, ბრალდებული შემთხვევის ადგილიდან არ მიმალულა და საგამოძიებო მოქმედებების დროს ადგილზე იმყოფებოდა.
ადვოკატის ინფორმაციით, დაკავებული ქალი რუსეთის მოქალაქეა, მისი ქმარი კი უკრაინის მოქალაქეა. ორივე ბოლო წლების განმავლობაში საქართველოში ცხოვრობდა.
მძღოლს აღკვეთის ღონისძიებად პატიმრობა შეეფარდა. საქმეს შინაგან საქმეთა სამინისტრო სისხლის სამართლის კოდექსის 276-ე მუხლის მე-6 ნაწილით იძიებს, რაც ავტომობილის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ადამიანის სიცოცხლის მოსპობა გამოიწვია.
