ნიუ-იორკის ერთ-ერთ ყველაზე დაცულ და ცნობილ სიმბოლოზე, Empire State Building-ზე, ექსტრემალმა წყვილმა დაუჯერებელი და სახიფათო ტრიუკი განახორციელა. 33 წლის ანჯელინა ნიკოლაუ, რომელიც სოციალურ ქსელებში Angela-ს სახელით არის ცნობილი, და 32 წლის ივან კუზნეცოვი, Ivan Beerkus, შენობის წვერზე ავიდნენ და შავი ბანერი გაშალეს.
2024 წლის Netflix-ის დოკუმენტურ ფილმში „Skywalkers: A Love Story“ ნიკოლაუ ამბობს: „სიყვარული სიმაღლეს ჰგავს. შიში არასდროს ქრება, უბრალოდ სწავლობ, როგორ შეხვდე მას უკეთ.“
ოთხშაბათს წყვილმა ეს ფრაზა რეალობად აქცია. ისინი დაახლოებით 1 450 ფუტის სიმაღლეზე ავიდნენ და ბანერი გაშალეს წარწერით: „როცა სიყვარულის ძალა ძალაუფლების სიყვარულს სძლევს, მსოფლიო მშვიდობას იცნობს.“ სწორედ იქ შედგა ნიშნობა. შემდეგ კი ორივე სასამართლოს წინაშე მძიმე ბრალდებებით წარდგა, თუმცა ზედამხედველობის პირობით გაათავისუფლეს.
ბევრს გაუჩნდა კითხვა, როგორ მოახერხა წყვილმა ნიუ-იორკის ერთ-ერთ ყველაზე ცნობილ შენობაში უსაფრთხოების სისტემის გვერდის ავლით შეღწევა. მით უფრო მაშინ, როცა ქალაქში უსაფრთხოების ზომები გაძლიერებული იყო მსოფლიო ჩემპიონატის მატჩების, ცნობილი ადამიანების ღონისძიებებისა და აშშ-ის 250 წლისთავთან დაკავშირებული ღონისძიებების გამო.
ნიკოლაუმ Instagram-ზე ასვლის ფოტოები და ვიდეოები გამოაქვეყნა. ერთ-ერთ კადრში მისი ნიშნობის ბეჭედიც ჩანს, ფონად კი ნიუ-იორკის პანორამაა. პროკურორების ინფორმაციით, კუზნეცოვმა პოლიციას მოგვიანებით უთხრა, რომ ნიშნობისთვის „რაღაც განსაკუთრებულის გაკეთება“ სურდა.
ალტერნატივად მას შეეძლო Empire State Building-ის ოფიციალური, 1 000-დოლარიანი ნიშნობის პაკეტი შეეძინა, რომელიც 86-ე სართულზე, ნახევრად კერძო სივრცეში, ნიუ-იორკის ხედის ფონზე ხელის თხოვნას სთავაზობს სტუმრებს. თუმცა ამ წყვილმა გაცილებით სახიფათო გზა აირჩია.
როგორც ნიკოლაუ დოკუმენტური ფილმის ტრეილერში ამბობს: „უსაფრთხოებას ყოველთვის აქვს ბრმა წერტილი.“
მანჰეტენის პროკურატურის ცნობით, წყვილი სოციალურ ქსელებში ცნობილია ექსტრემალური ქცევით. ისინი ხშირად შედიან აკრძალულ ტერიტორიებზე, ადიან მაღალსართულიანი შენობების სახურავებზე და ცათამბჯენებზე დამცავი აღჭურვილობის გარეშე ცოცავენ.
გამოძიების ინფორმაციით, ნიკოლაუ და კუზნეცოვი Empire State Building-ში ტრიუკამდე ერთი დღით ადრე, ჩვეულებრივი ვიზიტორების სახით შევიდნენ. სამშაბათს, საღამოს 9 საათზე, მათ 86-ე სართულზე მდებარე ღია ობსერვატორიის ბილეთები შეიძინეს. ეს დაახლოებით ორი საათით ადრე მოხდა, ვიდრე ბილეთებით შესვლა შეწყდებოდა.
შენობის ლობიში სტუმრები აეროპორტის მსგავს უსაფრთხოების შემოწმებას გადიან, მათ შორის ჩანთების შემოწმებასა და რენტგენულ სკანირებას. სამართალდამცავის ინფორმაციით, წყვილმა ეს პროცედურა გაიარა.
კამერების ჩანაწერებმა აჩვენა, რომ ისინი ობსერვატორიის კომპლექსში დაიმალნენ. გამოძიება ვარაუდობს, რომ წყვილი დახურვამდე ტექნიკურ ოთახში იმყოფებოდა და ღამე იქ გაატარა.
ოთხშაბათს, გამთენიისას, ვიდეოკამერებმა დააფიქსირა, როგორ ამოვიდნენ ისინი იატაკში არსებული ღიობიდან 102-ე სართულის ობსერვატორიის კომპლექსში. იქიდან შენობის შპილისკენ მიმავალი კიბეები მეტალის ბარიერებით იყო გადაკეტილი.
გამოძიების ინფორმაციით, კუზნეცოვმა ხელსაწყოებით მოხსნა კედელზე დამაგრებული დეტალები, რომლებიც ბარიერებს იჭერდა. ამის შემდეგ წყვილმა ბარიერებს გვერდი აუარა, ორი ბოქლომი გაჭრა და შპილის მიმართულებით გააგრძელა გზა.
საჩივრის მიხედვით, სამაუწყებლო ანტენამდე მისასვლელად მათ რამდენიმე შეზღუდული ზონა გაიარეს, მათ შორის 103-ე სართული, სადაც შესვლა მხოლოდ უსაფრთხო კარზე მიმაგრებული ბარათით არის შესაძლებელი. გამომძიებლები ამოწმებენ, ხომ არ იყვნენ ისინი Empire State Building-ში მანამდეც, რადგან შესაბამისი დასამალი ადგილის მოძებნას შენობის განლაგებისა და უსაფრთხოების სისტემის წინასწარი შესწავლა შეიძლება დასჭირვებოდა.
სამართალდამცავი წყაროს ცნობით, გამოძიება ვარაუდობს, რომ წყვილი ამ ტრიუკით სოციალურ ქსელებში პოპულარობის გაზრდასა და შესაძლოა კიდევ ერთი დოკუმენტური პროექტის რეკლამირებასაც ცდილობდა.
შუადღის შემდეგ, როდესაც მანჰეტენის ქუჩებში ხალხმა შენობის წვერზე ასული წყვილი შენიშნა, პირველი ზარი 911-ში დაფიქსირდა. მალევე საქმეში NYPD-ის ვერტმფრენიც ჩაერთო.
საჰაერო მოძრაობის კონტროლის ჩანაწერში ისმის, როგორ ეკითხება LaGuardia-ს დისპეტჩერი NYPD-ის პილოტს: „რა აურზაურია მანდ?“
პილოტი პასუხობს: „ორი გენიოსი Empire State Building-ის წვერზე, შპილზე ავიდა.“
„ოჰ, მაგარია“, - უპასუხა დისპეტჩერმა.
„ზემოთ რაღაც დროშას აფრიალებდნენ. და მან ახლახან ხელი სთხოვა,“ - თქვა პილოტმა.
Empire State Building-ის სამაუწყებლო ანტენა, რომელიც მაღალი სიხშირის რადიოსიგნალებს გამოსცემს და ადამიანის სხეულისთვის საფრთხის შემცველი შეიძლება იყოს, დაახლოებით 30 წუთით გამორთეს, რათა NYPD-ის საგანგებო სამსახურის თანამშრომლებს წყვილთან უსაფრთხოდ მიახლოება შესძლებოდათ.
პოლიციელები სპეციალური აღჭურვილობით დაახლოებით 1 250 ფუტის სიმაღლეზე ავიდნენ. საჩივრის მიხედვით, 104-ე სართულზე დაზიანებული უსაფრთხოების კარის საკეტის ზარალი დაახლოებით 2 000 დოლარად შეფასდა.
პოლიციელის სამხრე კამერის ჩანაწერში ისმის: „ადგილზე დარჩით.“
შემდეგ ოფიცერი ქალს მიმართავს: „როგორ ხართ? შეგიძლიათ ადგილზე დარჩეთ? აქ ყოფნა არ შეიძლება.“
„კარგად ვარ,“ - პასუხობს ქალი.
ნიკოლაუსა და კუზნეცოვს ბრალი ედებათ მათ შორის უკანონო შეღწევაში, გაუფრთხილებლობით საფრთხის შექმნასა და ქონების დაზიანებაში. მანჰეტენის საოლქო პროკურატურის ინფორმაციით, ნიუ-იორკის კანონმდებლობით ეს ბრალდებები გირაოს გამოყენებას არ ითვალისწინებს.
წყვილის ადვოკატმა, ჯეისონ კრინსკიმ, სასამართლოს შემდეგ განაცხადა, რომ პროკურატურამ ბრალდებები ზედმეტად დაამძიმა. მისი თქმით, ამ ეტაპზე განცხადების გაკეთება „ნაადრევია“.
„ამ საკითხს სასამართლოში, შესაბამისი სამართლებრივი გზებით მივხედავთ,“ - თქვა მან.
შემდეგ კი დაამატა: „მართლა, რა გზაა ხელის სათხოვნელად... რაღაც დამსახურება მაინც უნდა ვაღიაროთ.“
NYPD-ის ხელმძღვანელმა მაიკლ ლიპეტრიმ განაცხადა, რომ „მძიმე დანაშაულის ბრალდებები“ მკაფიო გზავნილია. „შედეგები იქნება,“ - თქვა მან.
Empire State Building-ის წარმომადგენელმა მომხდარს „უნებართვო ქმედება“ უწოდა და NYPD-ს დახმარებისთვის მადლობა გადაუხადა. მისი განცხადებით, შენობის მობინადრეებს, ვიზიტორებსა და ობსერვატორიის სტუმრებს საფრთხე არცერთ მომენტში არ შექმნიათ.
სასამართლოს შემდეგ ჟურნალისტებმა კუზნეცოვს ჰკითხეს, რატომ აირჩიეს ბანერზე „სიყვარულის ძალის“ შესახებ გზავნილი.
„იმიტომ, რომ სიყვარულის გვჯერა,“ - უპასუხა მან.
იმ დღეს, როცა ცენტრალურ პარკში ტემპერატურამ 100 ფარენჰაიტს მიაღწია, ნიუ-ჯერსიში მცხოვრები ნიკოლაუ და კუზნეცოვი სასამართლოდან ხელჩაკიდებულები გამოვიდნენ. მოგვიანებით, მეტროს კიბეებთან, ჟურნალისტებისა და ფოტოგრაფების თვალწინ, ისინი გაჩერდნენ და ერთმანეთს დიდხანს აკოცეს.
