ეგვიპტის ქალაქ გიზასთან ახლოს მატარებლის ავარიის შედეგად სულ მცირე შვიდი ადამიანი დაიღუპა, ხოლო დაშავებულთა რაოდენობა ასს აჭარბებს.

ქვეყნის სარკინიგზო ადმინისტრაციის ინფორმაციით, გიზასა და კაიროდან სამხრეთით მიმავალი ორი მატარებელი ერთმანეთს შეეჯახა, რის შედეგადაც რამდენიმე ვაგონი რელსებიდან გადავიდა და ბორცვზე გადავარდა.

შემთხვევის ადგილიდან გავრცელებულ ფოტოებში ჩანს, როგორ ცდილობენ ადამიანები გადაბრუნებულ ვაგონებში დაშავებულების მოძებნას, ხოლო მაშველები მასშტაბურ ოპერაციას ატარებენ.

ეგვიპტის პრეზიდენტმა აბდელ ფატაჰ ალ-სისიმ განაცხადა, რომ სახელმწიფო უწყებებს უბრძანა „გამოიძიონ ავარიის გარემოებები და პასუხისგებაში მიეცენ ყველა, ვინც დაუდევრობით გამოირჩეოდა“.

საჯარო პროკურატურამ გააფრთხილა, რომ დაღუპულთა რაოდენობა შესაძლოა გაიზარდოს.

მთავრობის ცნობით, შემთხვევის ადგილთან მდებარე საავადმყოფოები „განსაკუთრებულ მზადყოფნაზე“ გადაიყვანეს, რათა დიდი რაოდენობით დაშავებულების მიღება შეძლონ.

ეგვიპტის ჯანდაცვის მინისტრმა, დოქტორ ხალედ აბდელ ღაფარმა განაცხადა, რომ დაშავებულებს მოტეხილობებისა და თავის ტრავმების გამო მკურნალობენ.

მინიტრის ინფორმაციით, დაღუპულებს შორის ერთ-ერთი მატარებლის მძღოლიც არის.

ავარიაში მონაწილე პირველი მატარებელი გიზადან ფაიუმის მიმართულებით, კაიროს სამხრეთით მიდიოდა, როდესაც ის შეეჯახა მეორე მატარებლის უკანა ნაწილს, რომელიც კაიროდან ასუანისკენ მიმავალ ხაზზე გაჩერებული იყო.

შემთხვევის ადგილიდან გავრცელებულ ფოტოებში ჩანს, რომ რამდენიმე ვაგონი გადაბრუნდა, ხოლო ერთ-ერთი ვაგონის კორპუსი შუაზეა გაყოფილი.

გიზასა და ზემო ეგვიპტის რეგიონს შორის მატარებლების მოძრაობა შეჩერდა, ხოლო ადგილზე სპეციალური ამწეები მიავლინეს, რათა დაზიანებული ვაგონები მოაცილონ.

შეჯახება კაფრ ამარისა და ალ-რაქას სადგურებს შორის, ალ-აიათის რაიონში მოხდა — იმავე ადგილთან ახლოს, სადაც 2002 წლის თებერვალში ეგვიპტის ისტორიაში ყველაზე მძიმე სარკინიგზო კატასტროფა მოხდა: კაიროდან ლუქსორისკენ მიმავალ მგზავრულ მატარებელს ცეცხლი გაუჩნდა.

მატარებელი დაახლოებით ცხრა კილომეტრი (5.6 მილი) განაგრძობდა მოძრაობას, სანამ საბოლოოდ გაჩერდებოდა.

იმ შემთხვევის შედეგად ოფიციალურად 370-ზე მეტი ადამიანი დაიღუპა, თუმცა ზოგიერთი შეფასებით, მსხვერპლი გაცილებით მეტი იყო.

2009 წელს ამავე რაიონში კიდევ ორი ავარია მოხდა, სადაც ათობით ადამიანი დაიღუპა.

კვირას ეგვიპტეში საზოგადოებაში გაჩნდა მოწოდებები, რომ ტრანსპორტის მინისტრი ბოლო მომაკვდინებელი სარკინიგზო კატასტროფის გამო გადადგეს.