სენეგალის ჩრდილო-დასავლეთ სანაპიროსთან მიგრანტებით დატვირთული პატარა ნავის ჩაძირვის შედეგად, სულ მცირე, 21 ადამიანი დაიღუპა, - აცხადებენ სენეგალის ხელისუფლების წარმომადგენლები.
ბოლო წლებში ათასობით ადამიანი დაიღუპა მას შემდეგ, რაც სენეგალის სანაპიროდან ნავებით ცდილობდნენ ესპანეთის კანარის კუნძულებზე მოხვედრას სახიფათო ატლანტიკის მარშრუტით.
სენეგალის შინაგან საქმეთა სამინისტროს ინფორმაციით, ნავის გადაბრუნების შემდეგ მხოლოდ ერთი ადამიანი გადაარჩინეს, ხოლო 21 ცხედარი ამოიყვანეს.
სამინისტრომ ასევე აღნიშნა, რომ ეს მონაცემები "წინასწარია" და სამძებრო-სამაშველო ოპერაციები კვლავ გრძელდება.
შემთხვევა ქებემერის მახლობლად მოხდა, რომელიც დედაქალაქ დაკარიდან დაახლოებით 180 კილომეტრით (დაახლოებით 112 მილი) ჩრდილოეთით მდებარეობს.
შაბათს, სამინისტრომ ხაზი გაუსვა მთავრობის "მტკიცე განზრახვას, ებრძოლოს ადამიანებით ვაჭრობის ქსელებს, განსაკუთრებით მეზობელ ქვეყნებთან გაძლიერებული თანამშრომლობის გზით".
სენეგალის ხელისუფლების ცნობით, პარასკევს მათ შეაჩერეს 142 მიგრანტი, რომლებიც მსგავსი ნავით ესპანეთის ტერიტორიაზე მოხვედრას ცდილობდნენ. ნავში დასავლეთ აფრიკის რამდენიმე ქვეყნის მოქალაქე იმყოფებოდა.
El Hierro-მ მიგრანტების ნაკადების გამო საგანგებო მდგომარეობა გამოაცხადა
კანარის კუნძულებზე მდებარე ელ იეროს კუნძულის ხელისუფლებამ შაბათს საგანგებო მდგომარეობა გამოაცხადა მას შემდეგ, რაც მიგრანტების ნავებით ჩამოსვლის შემთხვევები მკვეთრად გაიზარდა.
ელ იეროს ოფიციალური პირების თქმით, თვეს დასაწყისიდან დღემდე კუნძულზე დაახლოებით 30 ნავით 3,300-ზე მეტი ადამიანი ჩავიდა.
"ძალიან შეშფოთებულები ვართ... ამ ჩამოსვლების მკვეთრი ზრდით," - განუცხადა ალპიდიო არმასმა, ელ იეროს რეგიონული საბჭოს ხელმძღვანელმა, ესპანურ ტელევიზიას.
"სწორედ ამან გვაიძულა საგანგებო მდგომარეობის გამოცხადება, რათა უზრუნველვყოთ თანამშრომლობის ჩარჩო უფრო მაღალ დონეზე მყოფ ინსტიტუტებთან," - დასძინა მან.
არმასის თქმით, კუნძულის საავადმყოფოში მდგომარეობა "დაუშვებელი" გახდა.
ელ იეროზე დაახლოებით 11,400 ადამიანი ცხოვრობს.
მიგრანტების ჩამოსვლამ 2024 წელს რეკორდულ მაჩვენებელს - 46,000-ს მიაღწია. ამის შემდეგ, ჩამოსვლების რაოდენობა მკვეთრად შემცირდა გაძლიერებული კონტროლისა და აფრიკის ქვეყნებთან თანამშრომლობის შედეგად.
