ევროკავშირმა რუსეთის წინააღმდეგ ადრე დაწესებული პერსონალური სანქციები კიდევ ექვსი თვით, 15 სექტემბრამდე გაახანგრძლივა. ამის შესახებ ევროკავშირის საბჭომ ოფიციალურ განცხადებაში აღნიშნა. შეზღუდვები ვრცელდება იმ პირებზე, რომლებიც პასუხისმგებელი არიან უკრაინის ტერიტორიული მთლიანობის, სუვერენიტეტისა და დამოუკიდებლობისთვის საფრთხეში ჩაგდებაში ან მის შელახვაში.
ევროკავშირის სანქციების სიაში დაახლოებით 2600 ფიზიკური და იურიდიული პირია შეყვანილი. საბჭოს განცხადებით, სიიდან ამოიღეს ხუთი გარდაცვლილი პირი. გარდა ამისა, ევროკავშირმა გადაწყვიტა, აღარ გააგრძელოს სანქციები ორი ფიზიკური პირის წინააღმდეგ.
გამოცემა „დოიჩე ველეს“ ცნობით, ეს პირები არიან ნიდერლანდელი ნავთობტრეიდერი ნილს ტრუოსტი და მაია ბოლოტოვა, რომელიც „ტრანსნეფტის“ ხელმძღვანელის ქალიშვილია.
ევროკავშირის მიერ დაწესებული სანქციები მოიცავს ევროკავშირის ქვეყნებში მოგზაურობის აკრძალვას, აქტივების გაყინვას და ასევე აკრძალვას, რომლის მიხედვითაც სიაში შეყვანილ პირებს ვერ მიეწოდებათ ფინანსური სახსრები ან სხვა ეკონომიკური რესურსები.
ამასთან, გამოცემა Euractiv ადრე წერდა, რომ უნგრეთმა და სლოვაკეთმა მოითხოვეს, სანქციების სიიდან ამოეღოთ რუსი მილიარდერები ალიშერ უსმანოვი და მიხაილ ფრიდმანი.
