იტალიის ორ ყველაზე პრესტიჟულ სათხილამურო კურორტზე მოთხილამურეები ამ ზამთარს ტრასებს შორის შესვენებისას ამერიკული სწრაფი კვების ქსელ KFC-ის შემწვარი ქათმის ვედროებით შეძლებენ დანაყრებას. ამ გადაწყვეტილებამ მთის და კულინარიის ტრადიციების დამცველები გააღიზიანა, ხოლო ერთმა ცნობილმა ბიზნესმენმა კი სასამართლოში სარჩელის შეტანითაც კი დაიმუქრა.
KFC 5 დეკემბერს გახსნის თავის პირველ მაღალმთიან რესტორნებს კორტინა დ’ამპეცოსა და მადონა დი კამპილიოში, დოლომიტებში. როგორც კომპანიაში აცხადებენ, ინიციატივის მიზანია „გააოცონ ადამიანები“ და „მივიდნენ ისეთ ადგილებში“, სადაც არავინ ელოდება მათ პოვნას.
ეს ნაბიჯი პირველი შემთხვევაა, როდესაც იტალიურ სათხილამურო ტრასაზე სწრაფი კვების ობიექტი იხსნება. მენიუში წარმოდგენილი იქნება KFC-ის ყველაზე პოპულარული პროდუქტები: ცხარე ფრთები, ბურგერები და ტრადიციული შემწვარი ქათმის ვედროები.
გეგმამ ბევრი ადამიანი გააოცა, მათ შორის ფალორია სპა-ს უმრავლესობის აქციონერი ალბერიკო ზარდინი, რომელიც კორტინა დ’ამპეცოში, ფალორიას მთაზე ინფრასტრუქტურას მართავს, სადაც KFC 2 123 მეტრზე უნდა გაიხსნას.
„უკვე იდეაც კი სამარცხვინოაა,“ – განუცხადა ზარდინიმ Il Messaggero-ს. „აბსურდია და სირცხვილია წარმოვიდგინოთ სწრაფი კვების ობიექტი კორტინას ყველაზე ლამაზ ადგილას. ნუთუ კორტინელები ვერ აცნობიერებენ, რას ვრისკავთ?“
ზარდინიმ განაცხადა, რომ ფალორიას ხელმძღვანელობას წერილობით მიმართა და გააფრთხილა, რომ სასამართლოში სარჩელს შეიტანს, თუ ისინი არ შეაჩერებენ KFC-ის მთის გეგმებს.
მისი თქმით, ეს „გიჟური გადაწყვეტილებაა“, განსაკუთრებით იმის გათვალისწინებით, რომ ობიექტი ფალორიას მთის კლუბის შიგნით გაიხსნება, სადაც ზედა სართულზე ლუქს კლასის ლოჟის გახსნა იგეგმება. „მე 100%-ით წინააღმდეგი ვარ და არ ვაპირებ უბრალოდ ვუყურო,“ – დასძინა მან.
მადონა დი კამპილიოში, დოლომიტების მეორე მხარეს, სამხრეთ-დასავლეთ ტრენტინოში, KFC 1 700 მეტრზე, პიანა დი ნამბინოზე, ელიტურ აპრეს-სკი კლუბის გვერდით განთავსდება.
ორივე ობიექტი სწრაფი კვების ქსელის „სწრაფი მომსახურების რესტორნების“ კატეგორიაში შედის და კომპანიის მიზანია, ერთგული Z თაობის მომხმარებლების გარდა, უფრო ფართო აუდიტორიაზე – „ახალგაზრდა ოჯახებიდან მთის მოყვარულებამდე“ – გასვლა, განაცხადა მარცია ფარემ, KFC Italia-ს მარკეტინგის დირექტორმა.
„ჩვენ ძალიან გვინდოდა ეს პროექტი, რადგან ის სრულყოფილად ასახავს KFC-ის განვითარების ჩვენს ხედვას: გავაგრძელოთ გაოცება, მივიდეთ ისეთ ადგილებში, სადაც არავინ ელოდება ჩვენს პოვნას და ეს გავაკეთოთ ისე, რომ არ დავთმოთ ის, რაც გვაქცევს უნიკალურად,“ – განუცხადა მან brandnews.it-ს.
ცხადია, რომ იტალიაში სათხილამურო აბონემენტების ფასის ყოველწლიური ზრდის ფონზე, ეს ობიექტები განსაკუთრებით მიმზიდველი იქნება მათთვის, ვინც ძვირადღირებულ კურორტებზე იაფი საკვების ძიებაშია.
თუმცა, იტალიური პრემიუმ საკვების ქსელ Eataly-ს დამფუძნებელმა ოსკარ ფარინეტიმ განაცხადა, რომ ეს ბრენდი „საერთოდ არ ეკუთვნის აქაურობას“ და პასუხისმგებლობა მომხმარებლებზე დააკისრა. „ჩვენ, იტალიელმა მომხმარებლებმა, ცოტა უფრო კულტურულები უნდა ვიყოთ,“ – უთხრა მან Il Sole 24 Ore-ს. „უნდა დავაფასოთ ჩვენი სიმდიდრე – სამზარეულო, რომელიც რამდენიმე ინგრედიენტითა და უმაღლესი ხარისხის პროდუქტებით იქმნება. აკლია საკუთარი ფესვების შესწავლა – შემწვარ ქათამს ვჭამთ, როცა შეგვიძლია გემრიელი სალამის ნაჭერი და ცივი ღვინის ჭიქა მივირთვათ.“
მთის გარემოს დაცვის არასამთავრობო ორგანიზაცია Mountain Wilderness-ის წარმომადგენელმა ლუიჯი კაზანოვამ Corriere della Sera-ს განუცხადა: „პოლენტისა და ლუგანეგას ძეხვის ეპოქა დასრულდა,“ ხოლო ტრენტინოს პროვინციული საბჭოს წევრმა პაოლა დემაგრიმ აღნიშნა, რომ მთის იდენტობა „კენტუკის ქათამზე გაიყიდა“.
სხვა კომენტატორები უფრო ზომიერები იყვნენ. ტრენტინოს უძველესი მთის ასოციაციის, Società Alpinisti Tridentini-ს პრეზიდენტმა კრისტიან ფერარიმ თქვა: „ჩვენ არაფერი გვაქვს შემწვარი ქათმის წინააღმდეგ, მაგრამ ნამდვილად ესაა ის საკითხი, რაზეც ყველაზე მეტად უნდა ვღელავდეთ?“
