
დანია რუსულ სადაზვერვო სამსახურებს უკრაინული წარმოშობის ამერიკელის მკვლელობის დაგეგმვაში ადანაშაულებს და აცხადებს, რომ მათ ეს მცდელობა „დაგეგმეს“ და „დაიწყეს“.
დანიიის უსაფრთხოების და დაზვერვის სააგენტოს ინფორმაციით, მათ შეაჩერეს პირები, რომლებიც აპირებდნენ ამ ადამიანის მოკვლას — დანიელმა მედიამ სამიზნედ დაასახელა რეპერი Kyivstoner — კონცერტზე, რომელიც სექტემბერში უნდა გამართულიყო. ორი პირი მკვლელობის მცდელობასა და უცხო ქვეყნის სადაზვერვო სამსახურის დახმარებაში დაადანაშაულეს, თუმცა ორივემ ბრალი არ აღიარა.
დანიიის საგარეო საქმეთა მინისტრმა განაცხადა, რომ რუსეთის თავდაცვის ატაშე ქვეყნიდან გააძევებენ.
დანიაში რუსეთის საელჩომ ბრალდებებს „დაუმტკიცებელი“ უწოდა და აღნიშნა, რომ კოპენჰაგენმა ვერ წარმოადგინა მტკიცებულება მოსკოვის ჩართულობის შესახებ.
სოციალურ ქსელში გავრცელებულ განცხადებაში საელჩომ აღნიშნა, რომ გაჩნდა „დანიელი მოდელი“, რომელსაც ასე ახასიათებს: თითქოს „რუსული კვალი“ აღმოაჩინეს და „პროპაგანდისტული შოუსთვის“ გამოიყენეს. საელჩომ დანია „პროვოკაციებში“ დაადანაშაულა, რომლის მიზანიცაა „დანიელი მოსახლეობის დაშინება, რათა... რუსეთის წინააღმდეგ ხანგრძლივი დაპირისპირება გაამართლონ“.
რუსული სახელმწიფო მედიის ცნობით, მოსკოვის საგარეო საქმეთა სამინისტრომ განაცხადა, რომ ატაშეს გაძევებაზე „შესაბამისად“ უპასუხებს.
დანიელმა მედიამ მკვლელობის მცდელობის სამიზნედ დაასახელა რეპერი Kyivstoner, რომლის ნამდვილი სახელია ალბერტ ვასილევი.
დანიიის უსაფრთხოების და დაზვერვის სააგენტოს (PET) ინფორმაციით, პირები, რომლებიც სავარაუდოდ ცდილობდნენ მის მკვლელობას, დაკავშირებულნი იყვნენ დანიაში აკრძალულ ბანდასთან Loyal to Familia. სააგენტოს ცნობით, ეს ჯგუფი „ცნობილია ფართომასშტაბიანი, სერიოზული და ძალადობრივი კრიმინალური საქმიანობით“.
დანიიის უსაფრთხოების და დაზვერვის სააგენტომ (PET), რომელიც პოლიციასთან ერთად მუშაობდა საქმეზე, განაცხადა, რომ სამი პირი შეაჩერეს ავტომობილით გადაადგილებისას მუსიკალური სივრცის მახლობლად, სადაც Kyivstoner-ს 25 სექტემბერს უნდა გაემართა კონცერტი.
PET-ის ცნობით, მანქანაში ცეცხლსასროლი იარაღი და დანები აღმოაჩინეს.
ამის შემდეგ, საქმესთან დაკავშირებულ ორ პირს ბრალი წაუყენეს მკვლელობის მცდელობასა და უცხო ქვეყნის სადაზვერვო სამსახურის დახმარებაში.
ორივე ბრალდებულმა ბრალი არ აღიარა, იტყობინება ადგილობრივი მედია.
ივლისში, რუსეთის უშიშროების ფედერალურმა სამსახურმა (FSB) ვასილევსა და უკრაინის ხელისუფლებას რუსეთის სამხედრო ობიექტებსა და პერსონალზე „ტერორისტული თავდასხმის“ ორგანიზებაში დასდო ბრალი. რეპერმა ეს ბრალდება სოციალურ ქსელში უარყო.
პარასკევს გაკეთებულ განცხადებაში, დანიიის საგარეო საქმეთა მინისტრმა ლარს ლიოკე რასმუსენმა განაცხადა, რომ სავარაუდო მკვლელობის მცდელობა იყო რუსეთის მხრიდან „შეშინების“ მცდელობა და დანიის უკრაინისადმი მხარდაჭერის შესუსტების სურვილი.
რუსეთის თავდაცვის ატაშემ ქვეყანა შვიდი დღის განმავლობაში უნდა დატოვოს, აღნიშნა რასმუსენმა.
მან ასევე განაცხადა, რომ დანია ევროკავშირს სთხოვს, შეზღუდოს რუსი მოქალაქეების მოგზაურობის შესაძლებლობა ევროპაში. მისი თქმით, მიუხედავად იმისა, რომ დანია უკვე ძალიან იშვიათად გასცემს ვიზებს, რუსებს შეუძლიათ სხვა ქვეყანაში მიიღონ შენგენის ვიზა და დანიაში ჩამოვიდნენ. რასმენის თქმით, დანია მოითხოვს, რომ ეს ვიზები მხოლოდ იმ ქვეყანაში მოქმედებდეს, რომელმაც ისინი გასცა.


















