ბარსელონას საფეხბურთო კლუბის ერთგულ გულშემატკივრებს მალე შესაძლებლობა ექნებათ, კლუბს საფლავიდანაც კი უქომაგონ – თუმცა, როგორც ბარსაში ყველაფერი, მარადიული ერთგულებაც ფასიანია.
კამპ ნოუს განახლების ფარგლებში, კლუბმა გახსნა „მემორიალი FC Barcelona“, რომელიც 26 000 ნიშას მოიცავს – აქ გულშემატკივრებს შეუძლიათ, თავიანთი ფერფლი კლუბის სტადიონზე, უკანასკნელი სასტვენის შემდეგ, დაასვენონ.
საფეხბურთო გუნდის მხარდაჭერა იმქვეყნიდან 10 წლის განმავლობაში 2 490 ევრო (2 082 გირვანქა სტერლინგი) ეღირება, ან 50 წლის განმავლობაში – 6 000 ევრო, ყოველწლიური მოვლის საფასური კი 70 ევროა. მარადიული ნიშის გარანტირება 10 000 ევრო დაგიჯდებათ, ხოლო მემორიალური დაფა დამატებით 490 ევრო ღირს.
მემორიალის წარდგენისას, კლუბის ინსტიტუციურმა ვიცე-პრეზიდენტმა, მარია ელენა ფორტმა განაცხადა: „როცა ჩემი ბაბუა მრავალი წლის წინ გარდაიცვალა, თქვა, რომ ერთადერთი სურვილი ჰქონდა – ბარსას მოედნის გვერდით დაეკრძალათ, რათა იმქვეყნადაც გაეგონა გოლების ხმა. ბევრ გულშემატკივარს იგივე ოცნება აქვს.“
მემორიალი, რომლის ავტორიც არქიტექტორი კიკე მონტოა, ოთხი დიდი განათებული კვადრატისგან შედგება, ხოლო მემორიალური დაფები მინის კედელზე დამონტაჟდება, რომელიც LED განათებით იქნება გამოკვეთილი. ურნები განთავსდება მურალთან, რომელიც კლუბის 125-წლიანი ისტორიის საკვანძო მომენტებს ეძღვნება.
ესპანეთის კონკურენტ კლუბებს – ატლეტიკო მადრიდს, ბეტისს და ესპანიოლს – უკვე აქვთ მცირე ზომის კოლუმბარიუმები თავიანთ სტადიონებზე.
ბარსელონას მემორიალის მშენებლობა მომავალ წელს დაიწყება და კლუბის განცხადებით, უკვე 1 000-ზე მეტმა ბარსას გულშემატკივარმა დაჯავშნა ადგილი. მათი შენატანები სტადიონის მასშტაბური რეკონსტრუქციის დაფინანსებას მოხმარდება – კამპ ნოუ 1957 წელს აშენდა.
2023 წელს კლუბმა წამოიწყო პროექტი, რომლის მიზანია სტადიონის ტევადობის 99 354-დან 105 000-მდე გაზრდა – ეს უემბლის სტადიონზე 15 000-ით მეტია და კამპ ნოუს მსოფლიოში მეორე ყველაზე დიდ საფეხბურთო არენად აქცევს, ფხენიანის რუნგრადოს 1 მაისის სტადიონის შემდეგ.
პროექტის საწყისი ღირებულება 900 მილიონ ევროს შეადგენდა, თუმცა ახლა უკვე 2 მილიარდ ევროს უახლოვდება და ამ ხარჯს ძირითადად არაბონუსიანი ბილეთების მფლობელები ფარავენ, რომელთაც ბოლო წლებში ბილეთების გაორმაგებული ფასები დააწვათ.
სამუშაოებს თურქული კომპანია Limak Construction ახორციელებს, თუმცა პროცესი ხშირი შეფერხებებითა და შრომითი დავებით მიმდინარეობს. 2024 წელს FC Barcelona-მ აღიარა, რომ სხვა დარღვევებთან ერთად, 1 000-ზე მეტ ქვეკონტრაქტორს ზეგანაკვეთური შრომისთვის ანაზღაურება არ მიუღია.
სამუშაოების დასრულება წლის ბოლოსთვის იგეგმება, თუმცა კლუბს მომდევნო სეზონის ნაწილს ოლიმპიურ სტადიონზე (ტევადობა – 55 926) მოუწევს თამაში, სანამ კამპ ნოუზე სახურავს დაამონტაჟებენ.
