კრემლის პროპაგანდისტული ტელეკომპანია RT-ის მთავარმა რედაქტორმა, მარგარიტა სიმონიანმა განაცხადა, რომ სომხეთის პრემიერ-მინისტრ ნიკოლ ფაშინიანის მხარდამჭერებს რუსეთის ფედერაციაში შესვლის უფლება არ უნდა ჰქონდეთ.

„ყველა სომეხს, ვინც ფაშინიანს უჭერს მხარს, რუსეთის ფედერაციაში შესვლა უნდა აეკრძალოს. სამუდამოდ“, - თქვა სიმონიანმა „რასია 1-ის“ ეთერში.

მისი თქმით, ფაშინიანის მხარდაჭერა რუსოფობიის მხარდაჭერას ნიშნავს. „თუ ფაშინიანს უჭერთ მხარს, ესე იგი, რუსოფობიას უჭერთ მხარს. ხოლო თუ რუსოფობიას უჭერთ მხარს, გამოდის, რომ რუსეთი გძულთ. ესე იგი, დაგავიწყდათ გრიბოედოვი“, - განაცხადა მან.

სიმონიანმა ასევე აღნიშნა, რომ ამ პოზიციას, როგორც თავად ამბობს, „წმინდა სისხლის სომეხი“ აფიქსირებს. მისი თქმით, ფაშინიანის მომხრეებს, რომლებსაც მან „რუსეთის მოძულეები“ და „უმადური ქმნილებები“ უწოდა, რუსეთში შესვლა სამუდამოდ უნდა აეკრძალოთ.

„როგორც წმინდა სისხლის სომეხი, მოვუწოდებ, რომ ფაშინიანის მხარდამჭერებს - ანუ რუსეთის მოძულეებს, უმადურ ქმნილებებს, რომლებმაც მას ხმა მისცეს - სამუდამოდ აეკრძალოთ ჩემს მშობლიურ ქვეყანაში, რუსეთში, შესვლა“, - განაცხადა მარგარიტა სიმონიანმა.

სომხეთმა მარგარიტა სიმონიანს ქვეყანაში შესვლა 2022 წლის ბოლოდან აუკრძალა. ის რუსეთის პროპაგანდისტული ტელეარხის, Russia Today-ის მთავარი რედაქტორია.

2023 წელს, ფაშინიანის განცხადებების კომენტირებისას, სიმონიანმა სომხეთის პრემიერ-მინისტრს „გადაჯიშებული“ და „სომეხი ხალხის მოღალატე“ უწოდა. მისი თქმით, ფაშინიანს „სძულს რუსეთი და ატყუებს პუტინს“.

2026 წლის 12 იანვარს კი კრემლის კიდევ ერთი პროპაგანდისტის, ვლადიმირ სოლოვიოვის განცხადების გამო, სომხეთის საგარეო უწყებამ რუსეთის ელჩს საპროტესტო ნოტა გადასცა.

ბოლო პერიოდში რუსეთსა და სომხეთს შორის დიპლომატიური ურთიერთობები დაძაბულია. ამის ერთ-ერთ მთავარ მიზეზად სომხეთის საგარეო პოლიტიკაში დასავლეთთან ინტეგრაციისკენ უფრო ღია და მკაფიო კურსი სახელდება.