თოთხმეტი ადამიანი დაიღუპა და ათეულობით დაშავდა მას შემდეგ, რაც სატვირთო მანქანის მძღოლმა მართვა დაკარგა და რამდენიმე ავტომობილს შეეჯახა ფუჯაირაში, არაბთა გაერთიანებულ საამიროებში, - ამის შესახებ ქვეყნის შინაგან საქმეთა სამინისტრომ განაცხადა.
სამინისტროს ინფორმაციით, ავარიაში 23 ავტომობილი, მათ შორის ხუთი სატვირთო მანქანა მონაწილეობდა და შემთხვევა აღმოსავლეთ საამიროს შესასვლელთან, „ნელა მოძრავ მოძრაობაში“, შუაღამემდე ცოტა ხნით ადრე მოხდა.
დარტყმის შედეგად „სატვირთო მანქანას ცეცხლი გაუჩნდა და ალი რამდენიმე სხვა ავტომობილზეც გავრცელდა, რასაც მძიმე მსხვერპლი მოჰყვა“, - ნათქვამია სამინისტროს განცხადებაში.
ფუჯაირას პოლიციის ცნობით, 30 ადამიანი დაშავდა და საავადმყოფოში გადაიყვანეს. პოლიციისვე ინფორმაციით, დაღუპულთა იდენტიფიცირებისთვის დნმ-ის ანალიზები ტარდება.
პოლიციის განცხადებით, დაღუპულთა შორის არიან საამიროების მოქალაქეებიც.
არაბთა გაერთიანებულ საამიროებში ინდოეთის საკონსულომ განაცხადა, რომ დაღუპულებს შორის ინდოეთის მოქალაქეებიც არიან. საკონსულომ აღნიშნა, რომ დაუკავშირდა „დამწუხრებულ ოჯახებს“ და ადგილობრივ ხელისუფლებასთან ერთად მუშაობს დახმარებისა და მხარდაჭერის გასაწევად.
ოფიციალური პირების თქმით, სატვირთო მანქანა ჯერ ერთ ავტომობილს შეეჯახა, შემდეგ გადაბრუნდა და სხვა მანქანებს დაეჯახა, რომლებიც ქუჩაზე „ნელა მოძრავი მოძრაობის“ გამო გაჩერებულები იყვნენ.
საგანგებო სამსახურები, მათ შორის პოლიცია, სასწრაფო დახმარება და სამოქალაქო თავდაცვის ჯგუფები, შემთხვევის ადგილზე ოპერატიულად მივიდნენ, რათა ცეცხლი ჩაექროთ, დაშავებულები საავადმყოფოებში გადაეყვანათ და ტერიტორია დაეზღვიათ, სადაც სპეციალისტთა ჯგუფები ამ დრომდე რჩებიან.
შინაგან საქმეთა სამინისტრომ და პოლიციამ ღრმა მწუხარება და გულწრფელი სამძიმარი გამოუცხადეს დაღუპულთა ოჯახებს და დაშავებულებს სწრაფ გამოჯანმრთელებას უსურვეს.
დაშავებულთა ნახევარი მკურნალობის შემდეგ საავადმყოფოდან გაწერეს, დანარჩენები კი კვლავ სამედიცინო მეთვალყურეობის ქვეშ რჩებიან.
ხელისუფლების ცნობით, დაშავებულთა და დაღუპულთა შორის არიან საამიროების, ომანის, ინდოეთის, ბრაზილიის, პაკისტანის, იორდანიისა და ეგვიპტის მოქალაქეები.
