ჰამასის მიერ კონტროლირებადი ჯანმრთელობის სამინისტროს ინფორმაციით, ისრაელის საჰაერო დარტყმას ნასერის საავადმყოფოზე, რომელიც მდებარეობს ღაზას სექტორის სამხრეთ ნაწილში, ექვსი ადამიანი ემსხვერპლა და დაახლოებით 30 დაშავდა.
საავადმყოფოს დირექტორის თქმით, ღამით ორი რაკეტა მოხვდა შენობას, სადაც ქირურგიული განყოფილებები და რეანიმაცია იყო განთავსებული, თუმცა ერთ-ერთი რაკეტა არ აფეთქდა.
ჯანმრთელობის სამინისტრომ განაცხადა, რომ დაიღუპნენ სამედიცინო პერსონალი, პაციენტები და მათი ახლობლები, მათ შორის ქირურგი დოქტორი რიზქ აბუ შაირა. სამინისტრომ თავდასხმა "საერთაშორისო კანონებისა და კონვენციების უხეშ დარღვევად" შეაფასა.
ისრაელის სამხედრო ძალებმა განაცხადეს, რომ სამიზნე იყო ჰამასის შეიარაღებული ფრთის ერთ-ერთი მეთაური და სხვა მებრძოლები, რომლებიც საავადმყოფოს "შტაბ-ბინად" იყენებდნენ თავდასხმების დასაგეგმად.
ჰამასმა კი განაცხადა, რომ ისრაელი ავრცელებს "ცრუ ნარატივებს" და ცდილობს "ახალი ომის დანაშაულის დაფარვას".
საერთაშორისო სამართლის მიხედვით, საავადმყოფოები დაცულ ობიექტებად ითვლება, თუმცა ღაზას ომის განმავლობაში ისინი არაერთხელ გამხდარან თავდასხმის სამიზნე.
ისრაელი ჰამასს, რომელიც კვლავ აკონტროლებს ღაზას იმ ნაწილებს, სადაც ისრაელის ჯარები არ იმყოფებიან, ადანაშაულებს სამოქალაქო ინფრასტრუქტურის მიზანმიმართულ გამოყენებაში. ისრაელის მტკიცებით, ჰამასი საავადმყოფოებში ინახავს იარაღს და მართავს სარდლობისა და კონტროლის ოთახებს, რასაც ჰამასი უარყოფს.
ისრაელი არ უშვებს საერთაშორისო მედიასაშუალებებს, მათ შორის BBC-ს, ღაზაში, რაც ართულებს იქ მიმდინარე მოვლენების გადამოწმებას.
ნასერის სამედიცინო კომპლექსი ქალაქ ხან-იუნისში მდებარეობს და სამხრეთ ღაზას ყველაზე დიდი საავადმყოფოა, რომელიც თითქმის მილიონ ადამიანს ემსახურება.
სოციალურ ქსელებში გავრცელებულ ვიდეოში, ჰამასის მიერ კონტროლირებადი სამოქალაქო თავდაცვის სამსახურის პარამედიკოსი, რომელიც დარტყმის შემდეგ ადგილზე მივიდა, ამბობს, რომ რაკეტამ ხუთსართულიანი შენობა გაარღვია და ქირურგიული განყოფილების ერთ-ერთ ოთახში მოხვდა.
აქტივისტების მიერ გავრცელებულ სხვა კადრებში ჩანს შენობის შიგნით ძლიერი კვამლი და მეორე სართულზე დიდი ნგრევა, სადაც აფეთქებამ სამედიცინო აპარატურა და საწოლები მიმოაბნია.
საავადმყოფოს დირექტორმა, დოქტორმა აჰმედ ალ-ფარამ, მოგვიანებით პრესკონფერენციაზე განაცხადა, რომ ისრაელის ძალებმა ორი რაკეტა ესროლეს ალ-იასინის ქირურგიულ შენობას, თუმცა მხოლოდ ერთი აფეთქდა.
"რასაც ნასერის სამედიცინო კომპლექსში ვხედავთ, ეს პირველ რიგში ჯანდაცვის სექტორის მიზანმიმართული დარტყმაა. აქ საუბარია ექიმებზე, სამოქალაქო პირებზე, პაციენტებზე," — აღნიშნა მან.
"ასევე, საავადმყოფოს შიგნით ინფრასტრუქტურას უზარმაზარი ზიანი მიადგა."
BBC-სთვის მომუშავე ფრილანს ჟურნალისტის მიერ გადაღებულ კადრებში ჩანს ოპერაციული, პალატები, მედიკოსების საძინებელი, დერეფნები და ლიფტები, რომლებიც სერიოზულად დაზიანებულია.
საინფორმაციო სააგენტოებმა ასევე გამოაქვეყნეს ფოტოები, რომლებზეც, როგორც ჩანს, აუფეთქებელი რაკეტაა ასახული.
დოქტორმა მოჰამედ ქდეიჰმა, ზოგადი ქირურგიის სპეციალისტმა, რომელიც თავის არეში დაიჭრა, განაცხადა, რომ ის და სხვა სამედიცინო პერსონალი დაახლოებით 00:30 საათზე მუშაობას ამთავრებდნენ და დასაძინებლად ემზადებოდნენ, როდესაც აფეთქება მოხდა.
"ჩემი მთელი სხეული ნანგრევებში მოექცა. წამით ვიგრძენი, რომ გონებას ვკარგავდი ან ვკვდებოდი," — უთხრა მან BBC-ს.
"დავიწყე თავის დაღწევა და ყვირილი: 'ბიჭებო! ბიჭებო!' ვცდილობდი მუცვლად მევლო და ფეხი ნანგრევებიდან გამომეყვანა. საბოლოოდ თავი დავიხსენი. სიბნელე იყო, არანაირი განათება, არაფერი."
მისი თქმით, ის იწვა საწოლში დოქტორ რიზქ აბუ შაირას გვერდით, რომელიც დაიღუპა. კიდევ ერთმა კოლეგამ ფეხი მოიტეხა.
"დოქტორი რიზქი ყველაზე კეთილი ადამიანი იყო ამ განყოფილებაში. ძალიან კეთილი და მუდამ მზად იყო დახმარებისთვის... და, რა თქმა უნდა, ის ქირურგი იყო, ერთ-ერთი საუკეთესო ჩვენს შორის."
მან დაამატა: "პაციენტებიც დაიღუპნენ. ჩვენს გვერდით ოთახებში პაციენტები იყვნენ, რომლებიც დაიღუპნენ. ადამიანი საავადმყოფოში მკურნალობისთვის მოდის და ბოლოს ხალხის მხრებზე გაჰყავთ. არ ვიცი, ამას რა ჰქვია ადამიანობა."
ისრაელის სამხედრო ძალებმა განცხადებაში აღნიშნეს, რომ მათი "ზუსტი დარტყმის" სამიზნე იყო ჰამასის ხან-იუნისის ბრიგადის მეთაური, სახელად მოჰამედ აბუ ისმაილი, და სხვა მებრძოლები, რომლებიც "ნასერის საავადმყოფოში იმალებოდნენ".
"ტერორისტები განადგურდნენ, რათა აღმოგვეღო საფრთხე, რომელიც მათ წარმოადგენდნენ მას შემდეგ, რაც ნასერის საავადმყოფოს კომპლექსი შტაბ-ბინად გადააქციეს და იქიდან ათეულობით ტერორისტული ოპერაციის დაგეგმვას ცდილობდნენ ჩვენი ძალების წინააღმდეგ და ბრიგადის ძალის აღსადგენად," — ნათქვამია განცხადებაში.
სამხედროებმა დაამატეს, რომ დარტყმამდე წინასწარი გაფრთხილება ჰქონდათ გაცემული და გაავრცელეს აუდიოჩანაწერი, რომელშიც, მათი თქმით, ერთ-ერთი გაფრთხილებაა ჩაწერილი ღაზას ჯანდაცვის მაღალჩინოსნისთვის. თუმცა ფარა ამტკიცებს, რომ საავადმყოფოს შეტევის შესახებ არანაირი გაფრთხილება არ მიუღია.
ჰამასის განცხადებაში ისრაელის სამხედროების ბრალდებები უარყოფილია და შეფასებულია, როგორც "ცხადი მცდელობა, გაამართლონ დოკუმენტირებული დანაშაული სამოქალაქო სამედიცინო დაწესებულების წინააღმდეგ, რომლის დანიშნულება და ფუნქცია ყველასთვის ცნობილია".
"შენობის ხასიათი და მსხვერპლი პაციენტებს, ექიმებსა და სამედიცინო პერსონალს შორის ამხელს ამ ნარატივის სიცრუესა და სისუსტეს," — ნათქვამია განცხადებაში.
თუმცა, ადგილობრივმა აქტივისტებმა ღამით გაავრცელეს ინფორმაცია, რომ დარტყმის სამიზნე შესაძლოა ყოფილიყო ჰამასის მაღალი რანგის უსაფრთხოების ფიგურა, რომელიც შენობაში იმალებოდა.
ფარას თქმით, ეს იყო მეშვიდე შემთხვევა, როდესაც ნასერის საავადმყოფო ომის განმავლობაში დაიბომბა. 2025 წლის აგვისტოში, ორმაგმა ისრაელის დარტყმამ 22 პალესტინელი, მათ შორის ჟურნალისტები და სამედიცინო მუშაკები, იმსხვერპლა.
ჯანდაცვის მსოფლიო ორგანიზაციის (WHO) ინფორმაციით, ბოლო სამი წლის განმავლობაში ღაზაში ჯანდაცვის სექტორზე სულ 1 056 თავდასხმა დაფიქსირდა, რასაც 1 010 ადამიანი ემსხვერპლა.
"ღაზას სამედიცინო დაწესებულებები მისი მოსახლეობისთვის სასიცოცხლო მნიშვნელობისაა. ისინი უნდა იყოს დაცული. მათი მილიტარიზაცია ან დაბომბვა დაუშვებელია," — განაცხადა გაეროს სააგენტოს გენერალურმა დირექტორმა ტედროს ადჰანომ გებრეიესუსმა.
ხუთშაბათს მოგვიანებით, სულ მცირე კიდევ ოთხი პალესტინელი დაიღუპა ცალკეულ ინციდენტებში ღაზას ჩრდილოეთ და ცენტრალურ ნაწილებში.
მედიკოსების თქმით, სამი მათგანი ისრაელის საჰაერო დარტყმებს ემსხვერპლა ღაზას ქალაქში, ჯაბალიასა და დეირ ალ-ბალაჰში, ხოლო მეოთხე ისრაელის ცეცხლს შეეწირა ბურეიჯის ლტოლვილთა ბანაკში.
ისრაელის სამხედროებმა განაცხადეს, რომ დეირ ალ-ბალაჰში და ღაზას ქალაქში "ტერორისტები" გაანადგურეს.
ისრაელის დარტყმები ღაზაზე თითქმის ყოველდღიურად გრძელდება, მიუხედავად აშშ-ის შუამავლობით გასული წლის ოქტომბერში ისრაელსა და ჰამასს შორის მიღწეული ცეცხლის შეწყვეტის შეთანხმებისა.
ღაზას ჯანმრთელობის სამინისტროს მონაცემებით, რომელიც გაეროსთვის სანდოდ ითვლება, მას შემდეგ ღაზაში 1 620-ზე მეტი ადამიანი დაიღუპა.
ისრაელის განცხადებით, ამავე პერიოდში ღაზაში მისი ექვსი ჯარისკაცი დაიღუპა.
ჰუმანიტარული მდგომარეობა ღაზაში კვლავ მძიმეა და ბოლო დროს კიდევ უფრო გაუარესდა, მას შემდეგ რაც გასულ შაბათ-კვირას ძლიერი წვიმების შედეგად ათიათასობით დევნილი ოჯახის კარავი დაიტბორა.
ღაზას ომი დაიწყო ჰამასის მიერ 2023 წლის 7 ოქტომბერს სამხრეთ ისრაელზე განხორციელებული თავდასხმით, როდესაც დაახლოებით 1 200 ადამიანი დაიღუპა და 251 მძევლად აიყვანეს.
მას შემდეგ, ჯანმრთელობის სამინისტროს ინფორმაციით, ღაზაში 74 650-ზე მეტი ადამიანი დაიღუპა.
