აშშ-ის პრეზიდენტი დონალდ ტრამპი ბირთვული იარაღის შემცირებაზე გააკეთებს აქცენტს, როდესაც მომავალ კვირას ჩინეთში შეხვდება რუსეთის პრეზიდენტ ვლადიმერ პუტინს და ჩინეთის პრეზიდენტ სი ძინპინს, - განაცხადა თეთრმა სახლმა პარასკევს.

Reuters-ის ინფორმაციით, აშშ-ის მაღალი თანამდებობის პირმა აღნიშნა, რომ შეთანხმების მიღწევა მოსალოდნელი არ არის.

რა ვიცით ამ შეხვედრის შესახებ?

შეხვედრა დაგეგმილია ხუთშაბათს, აზია-წყნარი ოკეანის ეკონომიკური თანამშრომლობის (APEC) ფორუმის ფარგლებში შენჟენში და ეს იქნება პირველი ასეთი ტიპის შეხვედრა.

„პრეზიდენტი ტრამპი განიხილავს ბირთვული იარაღის შემცირებას მსოფლიოში, რომლის გავრცელებასაც ის ძალიან სახიფათოდ მიიჩნევს,“ - განუცხადა ჟურნალისტებს თეთრი სახლის პრესსპიკერმა ოლივია უეილზმა. ტრამპი ასევე დააყენებს აშშ-ისა და ისრაელის ომს ირანის წინააღმდეგ, თუმცა უკრაინის საკითხის წამოჭრა მოსალოდნელი არ არის, - განუცხადა ოფიციალურმა პირმა Reuters-ს.

„ჩვენ არ ველით, რომ რაიმე სახის შეთანხმებას მივაღწევთ,“ - აღნიშნა ოფიციალურმა პირმა. „ეს რთული თემაა ჩინეთისთვის, მაგრამ ვფიქრობთ, რომ დროა, ჩინეთმა უფრო აქტიური როლი ითამაშოს და სერიოზულ საკითხებზე სერიოზული საუბარი დაიწყოს.“

რა პოზიცია აქვს ჩინეთს?

ჩინეთი დიდი ხანია უარს ამბობს ბირთვულ მოლაპარაკებებში ვაშინგტონთან მონაწილეობაზე, ამტკიცებს, რომ რუსეთმა და აშშ-მა, რომელთაც ყველაზე დიდი არსენალები აქვთ, ერთმანეთთან უნდა ისაუბრონ.

ოქტომბერში, ჩინეთის საგარეო საქმეთა სამინისტრომ განაცხადა, რომ „არც სამართლიანი, არც გონივრული და არც რეალისტურია ამ ეტაპზე ჩინეთისთვის ე.წ. სამმხრივ ბირთვულ განიარაღების მოლაპარაკებებში მონაწილეობა.“

ჩინეთის სახელმწიფო მედიის ცნობით, სი ძინპინი სამიტზე ორმხრივ შეხვედრებს გამართავს, თუმცა სამმხრივ შეხვედრაზე არაფერი თქმულა. მოსკოვსა და პეკინს თეთრი სახლის განცხადებაზე კომენტარი ჯერ არ გაუკეთებიათ.

აშშ-რუსეთის New START-ის ხელშეკრულება თებერვალში ამოიწურა, რის შედეგადაც მსოფლიოში ყველაზე დიდ ბირთვულ არსენალებს მნიშვნელოვანი შეზღუდვები აღარ აქვთ. სტოკჰოლმის საერთაშორისო მშვიდობის კვლევის ინსტიტუტის (SIPRI) მონაცემებით, ყველაზე მეტი ბირთვული ქობინი რუსეთს აქვს, შემდეგ მოდის აშშ და ჩინეთი.

ტრამპი ორშაბათს ოთხდღიან აზიურ ტურნეში მიემგზავრება, რომლის ფარგლებშიც ფილიპინებსაც ეწვევა.