იტალიაში დაახლოებით 6 300 სკოლამ და შოტლანდიასა და ჩრდილოეთ ირლანდიაში 700-ზე მეტმა სკოლამ ბომბის საფრთხის შესახებ შეტყობინება მიიღო, ადგილობრივი ხელისუფლების ინფორმაციით.
იტალიაში რამდენიმე შენობა პრევენციის მიზნით ევაკუირებული იყო, თუმცა ქვეყნის პრემიერ-მინისტრმა ჯორჯა მელონიმ განაცხადა, რომ ამ დროისთვის ჩატარებულმა შემოწმებებმა "კონკრეტული საფრთხის" მტკიცებულება არ აჩვენა.
"ეს შეტყობინებები, როგორც ჩანს, უფრო მეტად დაკავშირებულია სტრატეგიასთან, რომელიც მიზნად ისახავს შეშფოთებისა და შფოთვის გამოწვევას," – დაწერა მელონიმ Facebook-ზე.
შოტლანდიის განათლების მინისტრმა მერი მაკალანმა აღნიშნა, რომ საზოგადოებისთვის საფრთხე არ არსებობს და სპეციალიზებული კიბერდანაშაულის ოფიცრები მუშაობენ შეტყობინებების წყაროს დასადგენად. ჩრდილოეთ ირლანდიაში განათლების წარმომადგენლებმა სკოლებს ურჩიეს, ღია დარჩენილიყვნენ, თუ პოლიცია სხვა მითითებას არ გასცემდა.
ამ დროისთვის უცნობია, დაკავშირებულია თუ არა ეს შემთხვევები ერთმანეთთან.
"როგორც მშობელი და როგორც მაჟორიტარი დეპუტატი, კარგად მესმის, რამდენად შემაშფოთებელი იქნება ეს მშობლებისთვის, მოსწავლეებისთვის, მზრუნველებისთვის და სკოლის პერსონალისთვის," – განაცხადა მაკალანმა.
შოტლანდიის პოლიციამ მანამდე განაცხადა, რომ გაფრთხილებები "დაუყოვნებლივ შეფასდა" როგორც ყალბი განგაში. თუმცა, რამდენიმე ადგილობრივმა ხელისუფლებამ დაადასტურა, რომ ზოგიერთ სკოლაში ევაკუაცია მაინც განხორციელდა.
"ჩვენი რეკომენდაციაა, რომ მხოლოდ ელფოსტის შინაარსის საფუძველზე სკოლების ევაკუაცია ან ბავშვების სახლში დატოვება საჭირო არ არის," – ნათქვამია Police Scotland-ის განცხადებაში.
იტალიელი ოფიციალური პირების თქმით, ოთხშაბათს ერთმა და იმავე ელფოსტამ მიაღწია 7 476 სახელმწიფო სკოლიდან 6 300-ის მისამართზე, კერძო სკოლები კი არ დაზარალებულან.
შეტყობინება, რომელიც, როგორც ითქვა, იყო გაგზავნილი ვინმე "მიხაილ ანდროპოვისგან, ვილაიათ დი მისოგინისტანის ლიდერისგან", ბევრ სკოლაში პანიკის მიზეზი გახდა.
BBC-მ ნახა ელფოსტა, რომელიც შოტლანდიურ სკოლებს გაეგზავნა და ტექსტის მსგავსება შეინიშნებოდა, ასევე მოხსენიებული იყო მიხაილ ანდროპოვის სახელი, თუმცა ამჯერად როგორც "Red Owl"-ის პროექტის ლიდერი.
იტალიის განათლების მინისტრმა ჯუზეპე ვალდიტარამ განაცხადა, რომ იტალიურ სკოლებში მომხდარი ინციდენტები, სავარაუდოდ, "კიბერშეტევა იყო და არა რეალური საფრთხე", და დაამატა, რომ აშკარაა სტრატეგია, რომელიც მთელ ევროპაში ავრცელებს მუქარებს ფრენებზე, სუპერმარკეტებსა და საავადმყოფოებზეც კი.
გასულ კვირას იტალიის აეროპორტები და ევროპის სხვა ქვეყნების ავიაკომპანიები ბომბის ყალბი განგაშების სერიამ დააზარალა, რამაც პანიკა, ევაკუაციები და მასშტაბური შეფერხებები გამოიწვია.
მიუხედავად იმისა, რომ მუქარების ნაწილი ექსტრემისტულ მისოგინიურ ჯგუფს მიეწერა, მოგვიანებით ამ ჯგუფმა უარყო კავშირი ყალბ გაფრთხილებებთან.
ოთხშაბათს მილანის ერთ-ერთმა დირექტორმა, ანა ბერტატომ, იტალიურ მედიას განუცხადა, რომ გამომგზავნის ელფოსტის მისამართი ინტერნეტში შეამოწმა: "ის უკვე სპამად იყო კლასიფიცირებული ტაივანის უნივერსიტეტის ერთ-ერთი სტუდენტის მიერ."
მილანის კიდევ ერთმა დირექტორმა, მასიმო ნუნციო ბარელამ, სააგენტო Adnkronos-ს უთხრა, რომ ელფოსტა მის ინბოქსში 08:59-ზე მივიდა და მაშინვე მიხვდა, რომ ეს სპამი იყო, რის გამოც სკოლა არ დაუხურავს და მშობლებსაც დაამშვიდა, ვინც სკოლის ბედი ტელეფონით იკითხა.
"ტექსტი თითქმის კომიკურიც კი იყო," – ამბობს ბარელა, – "ის ჰგავდა მარსიანელების შეტყობინებას: 'ჩვენ მოვედით, რომ გაგანადგუროთ.' ცოტა მეც კი გამეცინა."
მიუხედავად იმისა, რომ ოთხშაბათს ბევრი სკოლა თავდაპირველად ევაკუირებული იყო, განგაში მალევე მოიხსნა და მოსწავლეებს კლასებში დაბრუნების უფლება მისცეს. ზოგმა მშობელმა შვილები მაინც სახლში წაიყვანა, თუმცა მილანის სკოლების უმეტესობამ მოსწავლეები სახლში არ გაუშვა.
იტალიური მედიის ცნობით, ბოლო დღეებში უკვე 280-მდე სკოლის დირექტორმა მიიღო მუქარის შემცველი შეტყობინება.
ცენტრალური უმბრიის რეგიონის ხელმძღვანელმა, სტეფანია პროიეტიმ, განცხადებაში აღნიშნა: "უმბრიის სკოლებში ჩატარებულმა შემოწმებებმა უარყოფითი შედეგი აჩვენა და სამართალდამცველები სწრაფად და საფუძვლიანად ამოწმებენ თითოეულ შეტყობინებას."
