სურსათის ეროვნული სააგენტო ეხმაურება ცხოველთა დაცვის ორგანიზაციების, Animal Project-ის, Zero Strays Georgia-ს, Peteasy-ის, ფონდ „ცუკას“ და ორგანიზაცია „სამართალი ცხოველებისთვის“ მიერ გავრცელებულ ერთობლივ განცხადებას.

სააგენტოში აცხადებენ, რომ გავრცელებული ბრალდებები შესაძლოა საზოგადოების შეცდომაში შეყვანის მიზანმიმართულ მცდელობას წარმოადგენდეს ან არსებული ფაქტების დამახინჯებასა და საკითხის არასათანადო ცოდნას უკავშირდებოდეს.

სურსათის ეროვნული სააგენტოს ინფორმაციით, ძაღლების ჰიპერპოპულაციის მართვის პროგრამა სწორედ იმ ხუთი კომპონენტის გათვალისწინებით შემუშავდა და ხორციელდება, რომელთა დანერგვასაც ცხოველთა დაცვის ორგანიზაციები ითხოვენ.

სააგენტოს განმარტებით, პროგრამის მომზადებაში სპეციალური მოწვევით მონაწილეობდა ცხოველთა ჯანმრთელობის დაცვის მსოფლიო ორგანიზაციის, WOAH-ის მიერ რეკომენდებული ექსპერტი. მას ცხოველთა კეთილდღეობისა და მიუსაფარი ცხოველების პოპულაციის მართვის სფეროში 20 წელზე მეტი პროფესიული გამოცდილება აქვს.

ექსპერტი არის კომპანიონ ცხოველთა მართვის საერთაშორისო კოალიციის, ICAM-ის მმართველი საბჭოს წევრი, ასევე FAO-სა და TAIEX-ის ექსპერტი. იგი მრავალი წლის განმავლობაში ხელმძღვანელობს RSPCA-ის საერთაშორისო პროგრამებს ევროპისა და კავკასიის რეგიონში.

სააგენტოს ცნობით, პროგრამა საერთაშორისო ექსპერტის რეკომენდაციების საფუძველზე დაიგეგმა და CNVR მეთოდით მიმდინარეობს. ეს მეთოდი ძაღლების დაჭერას, სტერილიზაციას, ვაქცინაციასა და პირვანდელ გარემოში დაბრუნებას გულისხმობს.

ძაღლების გამრავლების საკითხი კანონმდებლობით რეგულირდება. უკონტროლო გამრავლების პრევენციის მიზნით, სააგენტო ახორციელებს პატრონიანი ძუ და ხვადი ძაღლების იდენტიფიკაცია-რეგისტრაციას, პატრონიანი ძუ ძაღლების სტერილიზაციასა და ჩიპირებას, ასევე მიუსაფარი და მიკედლებული ძაღლების რეგისტრაციას, ვაქცინაციას, სტერილიზაციასა და კასტრაციას.

სააგენტოს განმარტებით, ცხოველების იდენტიფიკაცია-რეგისტრაცია და მათი გამრავლების კონტროლი ხელს უწყობს ცხოველების ქუჩაში მიტოვების პრევენციას და იდენტიფიცირებული ცხოველის პატრონის პასუხისმგებლობის განსაზღვრას.

პატრონიანი და მიუსაფარი ცხოველების იდენტიფიკაცია-რეგისტრაციის ელექტრონულ სისტემაში უკვე დარეგისტრირებულნი არიან ამ სფეროში მოქმედი სუბიექტები და ცხოველთა რეგისტრაციის პროცესი აქტიურად მიმდინარეობს.

სააგენტოში ასევე აცხადებენ, რომ ძაღლების ჰიპერპოპულაციის მართვის პროგრამა მაქსიმალურად გამჭვირვალეა და ცხოველთა მოყვარულებთან, მიმკედლებლებსა და ადგილობრივ მუნიციპალიტეტებთან კოორდინაციით ხორციელდება.

ვეტერინარული პროცედურების დასრულების შემდეგ ცხოველები პირვანდელ არეალში ბრუნდებიან. შექმნილია სპეციალური „ფეისბუქ“ გვერდიც, რომელზეც მუდმივად ახლდება ინფორმაცია. პლატფორმაზე ქვეყნდება ძაღლების აყვანისა და ბუნებრივ გარემოში დაბრუნების ამსახველი ვიდეომასალა, ასევე პროგრამის განრიგი, თარიღები, ლოკაციები და მიმდინარე ტენდერების შესახებ ინფორმაცია.

„შესაბამისად, ცხოველთა დაცვის ორგანიზაციების მიერ გავრცელებული ცრუ ბრალდებები და ფაქტების დამახინჯება სიმართლეს არ შეესაბამება და რეალობას მოკლებულია“, - ნათქვამია სურსათის ეროვნული სააგენტოს განცხადებაში.

ცნობისთვის, Animal Project-ის თანადამფუძნებელმა ნათია ჩიქოვანმა გუშინ, ცხოველთა დაცვის ორგანიზაციების სახელით გამართულ ბრიფინგზე განაცხადა, რომ უკონტროლო გამრავლების შედეგად საქართველოში გაცილებით მეტი ძაღლი და კატაა, ვიდრე მათი აყვანის მსურველი ადამიანი.

ნათია ჩიქოვანის განცხადებით, პრობლემის აღმოფხვრის ერთადერთი აპრობირებული გზა ხუთი კომპონენტის ერთდროულად და ეფექტიანად ამოქმედებაა. აღნიშნული კომპონენტები, მათ შორის, მიუსაფარი კომპანიონი ცხოველების დათვლასა და მათ სტერილიზაცია-კასტრაციას მოიცავს.